Оқ уй АҚШ ва Франция президентлари Жо Байден ва Эммануэль Макроннинг 1 декабрь кунги тантанали кечки овқатига 500 минг доллар сарфлади. Бу ҳақда CNN ҳисоб-китобларидан маълум бўлди.
«Бизда мавжуд бўлган сўнгги маълумотларга кўра, бу ярим миллион долларни ташкил қилади», — дейилади CNN хабарида.
Бу суммага нафақат қимматбаҳо идишлар, балки безаклар, шунингдек, идиш-товоқ ижараси ҳам киради. Аввалроқ икки давлат етакчиларининг кечки зиёфати менюси тақдим этилган эди.
29 ноябрь куни Макрон Вашингтонга тўрт кунлик давлат ташрифи билан келганди. У Жо Байден президентлиги даврида АҚШга давлат ташрифи билан келган биринчи хорижий етакчига айланди. 1 декабрь куни Франция раҳбари Оқ уйда махсус ҳарбий эҳтиром билан кутиб олинди.
Аввалроқ Байден Twitter саҳифасига Макрон билан музқаймоқхўрлик қилаётгани акс этган суратни жойлаганди. Суратда икки давлат етакчилари ва уларнинг рафиқалари Вашингтондаги Фиола Маре итальян ресторанида ўтирганини кўриш мумкин.
Изоҳ (0)