2022 йилда Ўзбекистон рекорд ҳажмда — ўтган йилги кўрсаткичдан қарийб 2 баравар кўп тарвуз экспорт қилди. Бу ҳақда EastFruit хабар бермоқда.
Ушбу маҳсулотлар экспортининг ошиши, асосан, етказиб бериш ҳажмининг Қозоғистонга деярли икки баравар ҳамда Тожикистон ва Қирғизистонга бир неча баробар ортиши ҳисобига мумкин бўлди.
Бу йил Ўзбекистондан тарвуз экспорти мавсуми ўтган йилги билан бир вақтда, 15—20 май кунлари бошланди.
Статистик маълумотлардан маълум бўлишича, 2022 йил ноябрь ойининг иккинчи ярмида ушбу маҳсулотлар ташқи бозорларга жўнатилмай қўйди. Бу эса Ўзбекистонда тарвуз экспорт қилиш мавсуми якунланганини англатади.
2022 йилнинг май ойи бошидан ноябрь ойи охиригача Ўзбекистон жами 18,1 миллион долларлик 81,8 минг тонна тарвуз экспорт қилган.
Бу 2021 йилнинг шу даврига нисбатан 1,9 баробар ва 2020 йилнинг шу давридаги рекорд кўрсаткичдан 1,7 баробар кўпдир.
2022 йилда тарвуз экспорти географиясига келсак, ушбу маҳсулотларни ташқи бозорларга жўнатиш ҳажми қуйидагича тақсимланди:
- Қозоғистон — 42,4 минг тонна (умумий тарвуз экспортининг 51,8 фоизи);
- Россия — 17,2 минг тонна (21 фоиз);
- Қирғизистон — 10,5 минг тонна (12,8 фоиз);
- Тожикистон — 9,6 минг тонна (11,7 фоиз);
- Беларусь — 1,2 минг тонна (1,4 фоиз);
- Латвия — 674 тонна (0,8 фоиз);
- Мўғулистон — 154 тонна (0,2 фоиз);
- Эстония — 86 тонна (0,1 фоиз);
- Украина — 43 тонна (0,1 фоиз);
- БАА — 4 тонна.
2022 йилда ўтган йилнинг шу даврига нисбатан тарвуз экспортининг бундай кескин ўсишига асосан қўшни давлатларга жўнатишнинг кескин кўпайиши ҳисобига эришилди:
- Қозоғистон — 2021 йилдаги 23,9 минг тоннадан 2022 йилда 42,4 минг тоннагача, яъни 1,8 бараварга;
- Қирғизистон — 3,9 минг тоннадан 10,5 минг тоннагача, яъни 2,7 бараварга;
- Тожикистон — 60 тоннадан 9,6 минг тоннагача, яъни 160 бараварга.
Шунингдек, Россия бозорига экспорт ҳажмининг сезиларли ўсиши қайд этилди — ўтган йилги 14,4 минг тоннадан 2022 йилда 17,2 минг тоннагача, яъни 19 фоизга.
2022 йилги мавсумда тарвуз экспортининг бундай рекорд ҳажмига Ўзбекистонда яхши ҳосил ва ушбу маҳсулотлар нархининг нисбатан арзонлиги ёрдам берди.
Июнь ойининг биринчи ўн кунлигида — Ўзбекистондан тарвузнинг оммавий экспорти бошланганда ушбу маҳсулотларнинг ўртача улгуржи нархлари 2000—2500 сўм/кг оралиғида бўлиб, 2021 йилнинг шу даври даражасида эди.
Кейинги ойда Ўзбекистонда тарвузнинг улгуржи нархлари қарийб икки баравар арзонлашди ва 2022 йил июль ойининг биринчи ўн кунлигида ўртача улгуржи нархлар 1000—1500 сўм/кг оралиғида ўзгарди. Экспорт мавсуми якунига қадар Ўзбекистонда тарвузнинг ўртача улгуржи нархлари бир хил диапазонда сақланиб қолди.
Изоҳ (0)