Тошкент марказидаги «Алоқабанк»ка тегишли навбатдаги офис аукционга қўйилди. Бошланғич нарх — 300 млрд сўм

Тошкент шаҳар, Миробод тумани, Матбуотчилар кўчасидаги бино кимошди савдосига қўйилди. Маълумотлар E-auksion порталида эълон қилинган. 

Бино «Алоқабанк»нинг бош офиси бўлиб, банк кузатув кенгашининг баённомасига асосан аукционга чиқарилган. 

Бинонинг ер майдони 0,2 гектарни ташкил қилади. Бинонинг умумий майдони — 7 345 квадрат метр. Унда сув, электр энергияси таъминоти ва канализация тизими йўлга қўйилган. Газ эса мавжуд эмас. 3 қаватли банк биноси 2013 йилда қурилган бўлиб 169 та хонадан иборат. 

Аукционга қўйилган бинонинг бошланғич баҳоси — 302 млрд сўм. Аризалар 2023 йил 6 январь 09:00 га қадар қабул қилинади. Савдолар худди шу куни 10:00 да бошланади.

«Алоқабанк» Яшнобод туманидаги офисини ҳам қарийб 75 млрд сўмга кимошди савдосига қўйган эди. 

Аввалроқ Тошкентдаги «Ан-Нур» тўйхонаси МИБ томонидан аукционга қўйилгани ҳақида хабар берилган эди.