Бугун, 28 ноябрь куни Франция пойтахти Париж шаҳрида Франция—Ўзбекистон университетлари II форуми ўз ишини бошлади. Бу ҳақда Олий ва ўрта махсус таълим вазирлиги ахборот хизмати хабар берди.
Маълум қилинишича, Олий ва ўрта махсус таълим вазири Абдуқодир Тошқулов бошчилигидаги Ўзбекистон ОТМлари раҳбарларидан иборат делегация тадбирда иштирок этиш учун Парижда бўлиб турибди.
Форум айни пайтда Парижда ҳар йили анъанавий тарзда ўтадиган «Campus France–2022 учрашувлари» доирасида ташкил этилган. Тадбирда Франция университетларидан 500 га яқин ректорлар, илмий доира вакиллари, профессорлар иштирок этиши кўзда тутилган.
Ташриф доирасида икки давлат олий таълим соҳаси учун муҳим аҳамият касб этадиган бир қатор келишувларга эришиш ҳамда яккама-якка мулоқотлар олиб бориш, Ўзбекистон олий ўқув юртлари ва Франция таълим масканлари билан ҳамкорликда маданий тадбирлар ҳам ўтказиш кўзда тутилган.
Вазирлик хабарига кўра, халқаро анжуманда Франция томонидан 152 та ва Ўзбекистон томонидан 20 та олий таълим муассасаси раҳбарлари, шунингдек вазирлик ва идоралар масъуллари иштирок этади.
Навбатдаги форум ишида Франция университетлари билан тўғридан-тўғри икки томонлама ҳамкорликни янада кенгайтириш, хусусан, бир қатор йўналишларда қўшма таълим ва икки томонлама диплом берувчи дастурларни йўлга қўйиш, француз мутахассисларини Ўзбекистондаги олий таълим муассасаларида қисқа ва узоқ муддатли маъруза ўқиш, семинарларни ташкил этиш, талаба ва профессор-ўқитувчилар алмашинуви, малака ошириш, илмий фаолиятдаги ҳамкорликни ривожлантириш масалалари муҳокама қилинади.
Форум доирасида B2B форматида ректорлар учрашуви ўтказилиши, англашув меморандуми, битим ҳамда йўл хариталари имзоланиши кутилмоқда. Имзоланадиган ҳужжатлар асосан, Ўзбекистондаги қатор таълим масканларида «Халқаро меҳмонхона менежменти» магистратура дастурини йўлга қўйиш, педагогик кадрлар малакасини ошириш, тиббиёт соҳасида симуляцион таълимни жорий этишга хизмат қилади.
Изоҳ (0)