Ўзбекистоннинг қайси ҳудудида энг кўп узум етиштирилгани маълум бўлди

2022 йилнинг январь—сентябрь ойларида Ўзбекистонда қарийб 1,4 млн тонна узум етиштирилган. Бу ҳақда Давлат статистика қўмитаси хабар бермоқда.

Узум етиштириш ҳажми ўтган йилнинг мос даври билан солиштирилганда 3,8 фоизга ошган.

Ҳудудлар кесимида етиштирилган узум ҳажми:

• Қорақалпоғистон — 5,9 минг тонна;
• Андижон вилояти — 59,8 минг тонна;
• Бухоро вилояти — 186 минг тонна;
• Жиззах вилояти — 22,3 минг тонна;
• Қашқадарё вилояти — 78,2 минг тонна;
• Навоий вилояти — 74,4 минг тонна;
• Наманган вилояти — 95,2 минг тонна;
• Самарқанд вилояти — 507,5 минг тонна;
• Сурхондарё вилояти — 88,2 минг тонна;
• Сирдарё вилояти — 12,3 минг тонна;
• Тошкент вилояти — 75,4 минг тонна;
• Фарғона вилояти — 122,6 минг тонна;
• Хоразм вилояти — 35,6 минг тонна.

Шунингдек, 2022 йилнинг январь—октябрь ойларида Ўзбекистон 51 та хорижий давлатга қиймати 216,6 млн долларга тенг бўлган 245,2 минг тонна узум экспорт қилган.

Узум экспорти ўтган йилнинг мос даври билан солиштирилганда 41,6 минг тоннага ошган. Бироқ асосан Россияга етказиб берилмоқда.

Ўтган 10 ой мобайнида Ўзбекистон Россияга 140 минг тонна узум экспорт қилган. 2021 йилнинг мос даврида бу кўрсаткич 88 минг тоннага тенг бўлган эди.

Йил бошидан бери Қозоғистонга 48,8 минг тонна Ўзбекистон узумлари етказиб берилган ва бу давлат иккинчи поғонада. Бу ўтган йилнинг мос даврига нисбатан 14,2 минг тоннага камайган.

Январь—октябрь ойларида Қирғизистон (23 минг тоннадан 16,7 минг тоннага) ва Хитойга (9 минг тоннадан 7,3 минг тоннага) узум етказиб бериш ҳам 2021 йилнинг мос даври билан солиштирилганда камайган.

Аввалроқ қайси ҳудуд хорижга энг кўп узум экспорт қилгани ҳақида хабар берилганди.