2023 йилда глобал иқтисодий ўсиш 2009 йилдаги молиявий инқироз билан таққосланадиган даражага секинлашади. Бу ҳақда Робин Брукс бошчилигидаги Халқаро молия институти (IIF) таҳлилчилари томонидан тайёрланган тадқиқотга таяниб, Bloomberg хабар берди.
Унда қайд этилишича, 2023 йилда жаҳон ялпи ички маҳсулоти 1,2 фоизга ўсади. Бу 2009 йилдаги каби паст ўсишдир.
Жаҳон ялпи ички маҳсулотидаги пасайишнинг жиддийлиги асосан Украинадаги уруш қандай боришига боғлиқ, — дейди IIF таҳлилчилари.
IIF маълумотларига кўра, иқтисодий ўсишнинг секинлашиши Украинадаги уруш таъсирига энг кўп тушган Европада содир бўлади: минтақа мамлакатлари иқтисодиёти 2 фоизга қисқаради.
2023 йилда АҚШ ялпи ички маҳсулоти 1 фоизга ўсади. Умумий фонда эса «ижобий равишда ажралиб турадиган» Лотин Америкаси бўлади — унда иқтисодий ўсиш 1,2 фоизни ташкил қилади.
Қитъанинг товар экспортчилари озиқ-овқат ва энергия нархининг юқорилигидан фойда кўради, — дейди таҳлилчилар.
IIF маълумотларига кўра, келгуси йил глобал иқтисодиётнинг ягона энг катта «ҳайдовчиси» Хитой бўлади, бу эса COVID-19 сабаб бўлган чекловларни енгиллаштириши мумкин.
Октябрь ойида Халқаро валюта жамғармаси (ХВЖ) 2023 йилда глобал иқтисодий ўсиш прогнозини 2,7 фоизгача пасайтирди. Июль ойида ХВЖ ўсишни 2,9 фоиз, январда 3,8 фоиз бўлишини тахмин қилган эди.
Аввалроқ жаҳон бозорларида асосий озиқ-овқатлар нархлари пасайиши кутилаётгани ҳақида хабар берилганди.
Изоҳ (0)