Европа Иттифоқи (ЕИ) мамлакатлари элчилари Россия нефтининг максимал нархини муҳокама қилади. Бу бир баррель учун 65-70 доллар миқдорида белгиланиши кутилмоқда. Бу ҳақда манбаларга таяниб, Bloomberg хабар берди.
Reuters хабарига кўра, G7 давлатлари Россия нефти нархига ҳам худди шундай чегара белгилашни режалаштирмоқда.
Агентлик маълумотларига кўра, Европа Иттифоқи элчиларининг учрашувида чекловлар тўғрисида келишиб олинса, ЕИ Россия нефтига нарх чегарасини расман эълон қилади.
Bloomberg таъкидлашича, таклиф қабул қилиниши учун Европа Иттифоқига аъзо 27 давлатнинг барчаси буни қўллаб-қувватлаши керак.
Европа Иттифоқининг айрим расмийлари таклиф қилинган чегара жуда юқори деб ҳисоблайди.
Аввалроқ Европа Иттифоқи Россия нефтига юқори нарх чегарасини белгилашга тайёрлиги маълум қилингани ҳақида хабар берилганди.
Ноябрь ойида G7 мамлакатлари (АҚШ, Буюк Британия, Германия, Франция, Италия, Канада ва Япония) ташқи ишлар вазирлари Россиядан нефть нархининг юқори чегарасини жорий этиш тартиби тез орада якунланишини маълум қилган эди.
Якуний нарх чегараси ҳали белгиланмаган. Бироқ у бир баррель учун 60 доллар атрофида белгиланиши кутилмоқда.
5 декабрь куни Россиянинг Европа Иттифоқига нефть етказиб беришга қисман эмбаргоси ҳам кучга кириши керак. Россия расмийлари, агар бундай қарор жорий этилса, мамлакат нефть етказиб беришни тўхтатишини билдирган.
Изоҳ (0)