2022 йилнинг 9 ойи давомида 473 та компания IT Park резидентига айланди, улардан 142 таси хорижий капиталга эга компаниялар. Бу ҳақда IT Park матбуот хизмати хабар бермоқда.
IT Park резидент компаниялари сони бугунги кунга қадар 996 тага етиб, йил бошидан буён 190 фоизлик ўсиш кўрсаткичига эришди. Шу билан бирга, 736 та компания Тошкентда, 260 таси эса вилоятларда жойлашган.
996 та резидент компаниялардан:
- 333 таси — янги очилган компаниялар;
- 142 таси — хорижий капиталга эга компаниялар;
- 186 таси — таълим компаниялари;
- 291 таси — экспортёр-компаниялар, улардан: 150 таси — дастурчи-компаниялар ва 141 таси — BPO компаниялари.
Қайд этилишича, бугунги кунга қадар 592 та компания IT Park резиденти мақомини олган бўлса, 248 та компанияга бундай мақом берилиши рад этилди.
Бундан ташқари, 119 та компания IT Park олдидаги мажбуриятларини бажармагани учун резидент мақомидан маҳрум қилинди.
IT Park резидентларининг қандай вазифалари бор?
Маълумки, резидентлар ўз фаолиятини Вазирлар Маҳкамасининг 2019 йил 15 июлдаги 589-сон қарори талаблари асосида амалга ошириши ва IT Park резидентининг фаолият шартлари тўғрисидаги шартномага мувофиқ мажбуриятларни бажариши шарт.
IT Park резидентларининг вазифаларига қуйидагилар киради:
- Рўйхатга мувофиқ фаолият турларидан келиб чиқиб, фақат бизнес-режада кўрсатилган фаолият турларини амалга ошириш;
- ҳар чоракда IT Park дирекциясига ўз фаолияти тўғрисида маълумот бериш;
- ҳар йили молия-хўжалик фаолияти аудитини ўтказиш ва аудиторлик хулосасининг бир нусхасини IT Park дирекциясига юбориш;
- резидентнинг IT Park дирекцияси билан ишлаш шартлари тўғрисидаги шартномадан келиб чиқадиган мажбуриятларни бажариш.
Низом талабларини бузган резидентлар резидент мақомидан маҳрум қилинади ҳамда белгиланган тартибда уларни Ўзбекистон Давлат бюджетига тўлаш мажбуриятлари тикланган ҳолда солиқ имтиёзлари бекор қилинади.
Таъкидланишича, тақдим этилаётган имтиёзлар туфайли IT Park резидентлари томонидан қўшимча иш ўринлари яратилиб, Ўзбекистонда IT-мутахассислар сони кўпаймоқда.
Шундай қилиб, резидент компанияларда 14 590 киши фаолият юритади. Уларда ўтган йилнинг шу давридаги ходимлар сони 8640 нафарни ташкил қилган.
IT Park резиденти мақомини олиш учун юридик шахслар ўз аризалари ва бизнес-режасини электрон портал орқали қуйидаги ҳавола ёрдамида юборишлари керак: https://it-market.uz
Аввалроқ Ўзбекистонда 1 апрелдан IT соҳасида қатор имтиёзлар жорий этилгани хабар қилинган эди.
Изоҳ (0)