Европа космик агентлиги (EКА) космосга парвозлар учун тайёргарлик бошлаётган янги астронавтлар жамоасига илк бор ногирон киши ҳам киритилишини эълон қилди. У британиялик Жон Макфолл — жарроҳ ва собиқ параатлетчи, дейилган агентлик сайтидаги хабарда.
EКА бош директори Йозеф Ашбахер 22 500 дан ортиқ даъвогарлар орасидан танлаб олинган 17 кишининг номзодини тақдим этди. Ушбу янги астронавтлар синфида беш нафар профессионал астронавт, 11 нафар захирадаги ва бир нафар ногирон астронавт бор.
Жон Макфолл 19 ёшида мотоциклида аварияга учраган ва оқибатда оёғидан айрилган. Шундан сўнг у Британия Паралимпия терма жамоасига қўшилиб, спортчи сифатида карьерасини бошлаган.
«Ампутация қилинган одам сифатида мен космонавт бўламан деб сира ўйламагандим», — деди Жон Макфолл.
У космик миссиянинг бир қисмига айланиш учун ҳали кўп босқичдан ўтиши керак. Макфолл келажакдаги миссияларда ногиронларнинг ҳам иштироки учун зарур бўлган шароитларни синовдан ўтказиш мақсадида танланган.
«12 ойлик бошланғич тайёргарлик ўтаганидан сўнг, янги астронавтлар космик станцияда машғулотларнинг навбатдаги босқичини бошлашга тайёр бўлади, миссияга тайинлангандан кейин эса уларнинг тайёргарлиги миссиянинг аниқ вазифаларига мослаштирилади», — дейилади агентлик хабарида.
EКА маълумотларига кўра, шу вақтгача бирорта йирик Ғарб агентлиги коинотга «параастронавтларни» юбормаган.
Мавзуга доир: SpaceX тарихдаги биринчи космик сайёҳни Ой бўйлаб парвозга юборади
Изоҳ (0)