Сентябрда Украина ҳарбийлари адашиб, ўз ҳудудидаги турар-жойга ракета отган — NYT

Сентябрда Украина томонидан учирилган Америка ракетаси ўз йўналишидан оғиб, Донецк вилоятининг Киев назорати остидаги Крематорск шаҳрида турар жойга бориб теккан ва уч нафар тинч фуқарони яралаган. Бу ҳақда The New York Times газетаси маҳаллий аҳолига таяниб хабар берди. Америкада ишлаб чиқарилган АGM-88B ракеталари душманнинг радарлари ва ҳаво ҳужумига қарши мудофаа тизимларини йўқ қилишга мўлжалланган.

Нашр маълумотларига кўра, зарба 26 сентябрь куни маҳаллий вақт билан 18:00 атрофида берилган. Газета журналистлари ракета келиб тушган жойда қолган алоҳида металл бўлакларини тўплаб, уларни аниқлаштиришга муваффақ бўлган. Снаряд беш қаватли кўп хонадонли уйнинг юқори қаватига келиб теккан ва бино деворидан туйнук очган.

«Уч киши яраланган, дейишди. Ҳалок бўлганлар йўқ. Ракета ҳеч ким яшамайдиган хонадонга келиб тушган, қўшни хонадондагилар эса жабр кўрган… Аввал ҳам бу ҳудудга ракеталар келиб тушган. Энди биз сал шитирлаган овоздан ҳам қўрқиб қолганмиз», — дея нашр қўшни уйда яшайдиган аёлнинг сўзларини келтириб ўтди. Унинг гапларини бошқа қўшниларнинг кўрсатмалари тасдиқлаган. Украина Мудофаа вазирлиги газетанинг воқеа ҳақидаги саволига жавоб қайтармаган.

Нашр маълумотларига кўра, Украина қуролли кучлари ихтиёрида бўлган совет даврига оид МиГ қирувчилари АGM-88B қанотли ракетасини отишга мўлжалланмаган. Нашр ракета турар жойга келиб тушишига айнан нима — техник носозлик ёки нишондан адашиш сабаб бўлганини аниқлай олмади. АҚШ Мудофаа вазирлигидаги манбалари газетага маълум қилишича, идора Россия қўшиналри томонидан Американинг ушбу моделдаги ракеталари тутиб олингани бўйича ҳолатлардан хабардор эмас.

АGM-88 АҚШ Ҳарбий-денгиз кучлари ва Ҳарбий-ҳаво кучлари томонидан Вьетнамдаги урушдан кейин душманнинг ҳаво ҳужумига қарши мудофаа тизими ракеталарини йўқ қилиш вазифаларини бажарувчи ихтисослаштирилган жанговар самолётлар учун ишлаб чиқилган эди. Учирилганидан кейин, ракета зенит-ракета объектларига бириктирилган радарлардан тарқаладиган электромагнит нурланишнинг муайян турларини қидиради ва 48 километрдан ортиқ масофада бундай радиосигналлар манбаини топади.

Европарламент ҳисоб-китобларига кўра, Украинада ракета ва артиллерия зарбалари чоғида фуқаролик инфратузилмасининг 60 982 та объекти, шу жумладан, 42 818 та уй, 1960 та ўқув муассасаси, 396 та тиббий муассаса, 479 та маданий ва диний бинолар вайрон бўлган ёки зарар кўрган.

Аввалроқ Россиянинг БМТдаги доимий вакили Василий Небензя Россиянинг Украина инфратузилма объектларига зарбалари Киевга Ғарб томонидан қурол етказиб берилаётганига жавоб эканини айтган, шунингдек, «турар жойларнинг вайрон бўлиши ва тинч аҳоли орасидаги талафотлар Украинанинг шаҳар ташқарисида эмас, балки унинг нақ марказида жойлашган ҳаво ҳужумига қарши мудофаа тизими айби билан юз бераётгани»ни таъкидлаган эди. «Натижада ракеталар бўлаклари ёки ўз изидан чиқиб кетган Украина ракеталари Россия нишонга олмаган объектларга бориб тегмоқда», — деди у.