Кремль расмий вакили Дмитрий Песков Қозоғистон ҳақида «ўта нобоп» гаплар гапираётган сиёсатшуносларни тингламасликка чақирди, деб ёзади «РБК».
«Бу сиёсатшунослар ҳеч қандай тарзда ҳукуматнинг расмий позициясини акс эттирмайди», — дея аниқлик киритди Песков.
Шунингдек, у Россияда Қозоғистонга нисбатан «ўта қовушмаган иборалар» қўллайдиган сиёсатчилар Қозоғистонда Россияга нисбатан ниҳоятда танқидий ёндашувчи сиёсатшунослардан кам эмаслигини таъкидлади. Кремль вакили қўшимча қилишича, «шунчаки, уларни тинглаш ва томоша қилиш керак эмас».
Савол телевидениеда Владимир Соловьёвнинг дастури чоғида чиқиш қилган сиёсатшунос Дмитрий Дробницкийнинг гаплари юзасидан берилганди, у Қозоғистонни «кейинги муаммо» деб атаган. Унинг фикрича, у ерда ҳам Украинадаги каби «нацистик жараёнлар бошланиши мумкин». Шунингдек, Дробницкий «у ерда руслар кўп»лигини айтган.
Қозоғистон ташқи ишлар вазири ўринбосари Роман Василенко бундай баёнотлар Россия ҳукумати томонидан тегишлича муносабат билдиришга арзийди, деб айтди. Шу билан бирга, унинг қайд этишича, бундай баёнотлар Россия Федерациясининг расмий позициясини ифодаламаса-да, «Қозоғистон ва Россия ўртасидаги анъанавий яқин алоқаларга зиён етказади».
Мавзуга доир:
Изоҳ (0)