Украина ва Россия вакиллари 17 ноябрь куни Бирлашган Араб Амирликлари пойтахти Абу-Дабида учрашиб, ҳарбий асирларни қайтариш эвазига рус ўғитларини етказиб беришни қайта тиклаш масаласини муҳокама қилди. Бу ҳақда Reuters хабар берди.
Маълум қилинишича, гап Россия аммиакини Украинанинг Толятти—Одесса қувури орқали экспорт қилиш ҳақида кетмоқда. Киев ва Кремль ўртасидаги музокаралар Украинадан ғалла коридори фаолиятига қўйилган тўсиқларни ҳал қилишга ҳам қаратилган.
БАА музокараларда воситачилик қилган, Бирлашган Миллатлар Ташкилоти (БМТ) эса вакиллик қилмаган. Гарчи ташкилот Украинанинг учта портидан қишлоқ хўжалиги маҳсулотларини экспорт қилиш бўйича келишувларда марказий рол ўйнайди. Украинанинг Туркиядаги элчиси Василий Боднар украиналик ҳарбий асирларни озод қилиш ҳақиқатан ҳам Россиянинг аммиак экспортини қайта тиклаш бўйича музокараларнинг бир қисми эканини айтди.
«Албатта, имкон қадар ҳарбий асирларни қайтариш йўлларини излаяпмиз», — деб изоҳ берди у.
Бироқ Боднар Абу-Дабидаги учрашувдан хабардор эмаслигини маълум қилди. Ҳозирда ОАВ музокаралар қандай якун топгани ва учрашувда қандай келишувларга эришилганини аниқлай олмади.
Украина президенти Владимир Зеленский ноябрь ойида Россия раҳбари Владимир Путин тўғридан-тўғри музокаралар ўтказишни хоҳлаётгани, аммо у оммавий музокарага рози бўлишини маълум қилганди. Кремль матбуот котиби Дмитрий Песков эса ҳеч қандай оммавий музокара ўтказилмаслигини эълон қилган.
Изоҳ (0)