Тожикистон парламенти қуйи палатаси «Байрамлар тўғрисида»ги қонунга ўзгартириш киритиш лойиҳасини кўриб чиқди ва уни янги байрам – «Давлат сирларини ҳимоя қилиш соҳаси ходимлари куни» билан бойитди. Бу ҳақда парламент қуйи палатаси расмий сайтида хабар берилган.
Тожикистонда ушбу байрам ҳар йили 6 май куни нишонланади.
«Давлат сирларини муҳофаза қилиш соҳаси ходимлари кунининг таъсис этилиши давлат сирларини ўз ичига олган маълумотлар билан бевосита шуғулланувчи ўн минглаб турли соҳа ходимларига ўз касб байрамларини муносиб нишонлаш, ҳар йили ушбу соҳадаги долзарб масалаларни муҳокама қилиш ва ҳал этиш имконини беради», — дейилади ҳисоботда.
Аввалроқ Тожикистон ҳукумати мамлакатда давлат сирларини ҳимоя қилиш ва ахборотни техник муҳофаза қилишни кучайтириш бўйича 2022—2026 йилларга мўлжалланган Давлат дастурини тасдиқлаш, жумладан, давлат сирларини ҳимоя қилиш бўйича идоралараро комиссия тузиш топшириғини берганди. Мазкур тадбирларни амалга ошириш учун давлат бюджети ва бошқа манбалар ҳисобидан қарийб 15,6 миллион сомоний (1,5 миллион доллар) маблағ ажратиш режалаштирилган.
Давлат сирларини ҳимоя қилиш соҳаси ходимлари куни қонунга мувофиқ Тожикистонда 86-расмий байрам ҳисобланади.
Тожикистонда Давлат сирларини ҳимоя қилувчилар кунидан ташқари геологлар, энергетиклар ва муҳожирлар куни ҳам расмий даражада нишонланади. Шу билан бирга, йил давомида 86 та байрамдан фақат тўққизтаси дам олиш кунидир:
- 1 январь — Янги йил;
- 8 март — Оналар куни;
- 21—24 март — Халқаро Наврўз байрами;
- 9 май – Иккинчи жаҳон урушидаги Ғалаба куни;
- 27 июнь – Миллий бирдамлик куни;
- 9 сентябрь — Тожикистон республикасининг Давлат Мустақиллиги куни;
- 6 ноябрь — Тожикистон республикаси Конституцияси куни;
- Ҳар йили дин бўйича ваколатли орган томонидан белгиланадиган Рамазон ва Қурбон байрамлари кунлари.
Изоҳ (0)