Фарғонада фуқароларга ўзини консалтинг хизмати кўрсатувчи муассаса ходими деб таништириб, уларнинг пулларини олгач, ўз эҳтиёжларига сарфлаб юборган шахс ушланди.
Маълум бўлишича, Фарғона политехника институти битирувчи курс талабаси Ж.А. Фарғона шаҳридаги консалтинг хизмати кўрсатувчи муассасада бир неча ой менежер бўлиб ишлаган. Муассасанинг асосий фаолият йўналиши ёшларни чет элга ўқишга юбориш бўлиб, оз муддат орасида иш жараёни, талабаларни қай йўсинда хорижга юбориш, уларнинг ўқишини кўчириш тартибларини билиб олган Ж.А. ишдан бўшаса-да, бир неча фуқарога гўё «расмий тарзда ҳуқуқий ёрдам беришини» айтиб, уларнинг ишончини қозонган.
Жумладан, хорижда таҳсил олаётган Ш.Маматёқубов, Ш.Номонжонов, У.Арапов, М.Қодирова, Ф.Тожибоевларга ўзини консалтинг хизмати кўрсатиш муассасаси ходими сифатида таништирган. Сўнг уларнинг ўқишини Ўзбекистонга, хусусан, Фарғона водийсидаги исталган олийгоҳга кўчириб беришини айтган. Бу бўйича бир нечта ҳужжатларни тайёрлаган. Ўзганинг мулкини алдаш ва ишончни суиистеъмол қилиш йўли билан қўлга киритиш мақсадида уларнинг 400—500 доллардан пул маблағларини қўлга киритган. Сўнг пулларни ўз шахсий манфаатлари йўлида сарфлаб юборган.
2022 йил 18 январь куни Иқтисодий жиноятларга қарши курашиш департаменти Фарғона вилояти бошқармаси ходимлари томонидан ўтказилган тезкор тадбир давомида Ж.А. Фарғона шаҳри Ойбек кўчасида жойлашган туғуруқхона олдида Ф.Тожибоевдан кимёвий ишлов берилган 500 долларни олган вақтда ушланган ва ушбу пуллар ашёвий далил тариқасида олинган.
Суд барча тафсилотларни ўрганиб чиқиб, Ж.А.га нисбатан тегишли жазо тайинлади.
Изоҳ (0)