Turkiya armiyasi o‘zining Suriya va Iroqdagi “Changal-Qilich” operatsiyasi doirasida Anqara tomonidan terrorchilik tashkilotlari deb tan olingan Kurdiston ishchilar partiyasi va “Xalq mudofaasi otryadlari”ning 184 nafar a’zosini yo‘q qildi. Operatsiya natijalari haqida mudofaa vaziri Xulusi Akar ma’lum qildi, deb yozadi “Kommersant”.
“‘Changal-Qilich’ operatsiyasi boshidan buyon 184 nafar terrorchi yerusti o‘t ochish vositalari va aviatsiya yordamida zararsizlantirildi”, — dedi Akar Quruqlik qo‘shinlari qo‘mondonligi tezkor shtabida. Uning so‘zlariga ko‘ra, operatsiyaning birinchi bosqichida 89 ta obyekt, shu jumladan, boshpanalar, bunkerlar, g‘orlar, tunnellar va omborlar yo‘q qilingan.
Vazirning aytishicha, Anqara tinch aholiga, atrof-muhitga, tarixiy, madaniy va diniy inshootlarga zarar yetishining oldini olish uchun “alohida ko‘ngilchanlik ko‘rsatmoqda”. Suriyadagi kurdlar avvalroq Turkiyaning hujumi oqibatida oddiy fuqarolar va suriyalik harbiylar halok bo‘lganini ma’lum qilgandi.
Turkiya prezidenti Rajab Toyyib Erdo‘g‘on esa Turkiya tomonidan Suriya va Iroqqa berilgan zarbalar uchun javobgarlikni Rossiya zimmasiga yuklagan, u o‘z bo‘yniga olgan majburiyatlarni bajarmayotganini aytgandi. G‘arblik sheriklarni esa Erdo‘g‘on Turkiyada xavfsizlik sohasidagi vaziyatni beqarorlashtirishda aybladi.
Izoh (0)