Россия Давлат Думаси депутатлари россиялик ҳарбий асирларнинг ўлдирилиши акс этган видеоролик юзасидан баёнот қабул қилди, деб ёзмоқда Meduza.
Баёнотда қайд этилишича, видео «Киев ҳукуматининг нацистлик моҳиятини тасдиқлайди». Депутатлар Украинани ҳарбий асирларни қасддан ўлдиришда айблади, шунингдек, бундай ҳаракатлар халқаро гуманитар ҳуқуққа зид эканини эслатди.
Давлат Думаси депутатлари дунё давлатлари парламентларини Киев режимининг жиноятларини сўзсиз қоралашга, ғайриинсоний қотилликнинг бевосита айбдорлари ҳамда уларнинг ҳомийларини жавобгарликка тортишга ёрдамга чақиради, — дейилган баёнотда.Депутатлар «коллектив Ғарб»ни «бугунги Украинанинг неонацист мафкурасини» қўллаб-қувватлашдан бош тортишга чақирди. Уларнинг фикрича, Украина ҳукумати «провокациялар ва зўравонликни кучайтириш орқали дунёни глобал фалокат сари ундамоқда».
18 ноябрь куни Россия ва Украинанинг Telegram-каналлари Украина аскарлари томонидан камида ўн нафар россиялик ҳарбийнинг ўлдирилиши акс этган видеоларни тарқатди. Украина бош вазири ўринбосари Олга Стефанишина Киев видео юзасидан тергов ўтказишига ваъда берди. Кремль таъкидлашича, «бу жиноятни содир этганларни» Россиянинг ўзи қидиради.
15 ноябрь куни БМТ Инсон ҳуқуқлари бўйича Олий комиссари бошқармаси ҳисобот эълон қилди, унда Украина ҳарбий хизматчилари россиялик асирларни қийноққа солиб, уларга нисбатан шафқатсиз муносабатда бўлаётгани айтилган.
Изоҳ (0)