Associated Press агентлиги Польшага қулаган ракета ҳақидаги нотўғри маълумот учун журналист Жеймс Лапортани ишдан бўшатди. Бу ҳақда The Washington Post нашри АP таҳририятидаги манбаларга таяниб хабар бермоқда.
«АҚШ разведка хизматининг юқори мартабали мулозими маълумотларига кўра, Россия ракеталари НАТОга аъзо Польша чегарасини кесиб ўтган, оқибатда икки киши ҳалок бўлган», — дейилган эди Лапорта тайёрлаган хабарда.
Журналист таҳририятда ўтказилган терговдан сўнг ишдан олинган, деб ёзмоқда WP. Терговда маълум бўлишича, журналист АҚШ разведкасидаги аноним манбадан олган маълумотини иккинчи мустақил манба билан солиштирмасдан, материални нашр этишга таҳририятни кўндирган. У мазкур хабарнинг нашр этилиши гўёки муҳаррир томонидан тасдиқланганини баҳона қилган.
АП воқеага изоҳ беришдан бош тортди. Агентлик матбуот котиби Лорен Истоннинг таъкидлашича, АP нашр этилган маълумотларнинг тўғрилигига жуда жиддий ёндашади ва таҳририятда бу борада қаттиқ стандартлар мавжуд. «Ушбу стандартлар бузилганда, биз янгиликларнинг ишончлилигини ҳимоя қилиш учун зарур чораларни кўришга мажбур бўламиз», — дея қўшимча қилди у.
Ракета Польша ҳудудига 15 ноябрь куни, Россия қўшинлари Украинага йирик зарба йўллаган вақтда тушган. Дастлаб, ракета Россия томонидан учирилган деб тахмин қилинди, аммо тез орада Ғарб давлатлари бу Украинанинг ҳаво ҳужумидан мудофаа тизими ракетаси бўлиши мумкин, деган хулосага келди. Украина Қуролли кучлари уни Россия ракеталарини уриб тушириш учун учиргани тахмин қилинмоқда.
Ғарб давлатлари эса ракетанинг қулаши учун жавобгарлик барибир Россия зиммасида, деб ҳисобламоқда, чунки Украинадаги урушни айнан у бошлаган. Россия президентининг матбуот котиби Дмитрий Песковнинг айтишича, агар «орқага қаралса, ҳамма нарсанинг бош сабабчиси АҚШ ва НАТО бўлиб чиқади».
Украина Қуролли кучларининг Ҳарбий-ҳаво кучлари вакили Юрий Игнатнинг сўзларига кўра, 15 ноябрь куни Россия ҳарбийлари Украина ҳудудида 100 га яқин Х-101 ва Х-555 ракеталарини учирган. Украина президенти Владимир Зеленский бўлса Россия 85 та ракета учирганини айтди. Украина энергетика вазири Герман Галушенконинг таъкидлашича, бу уруш бошланганидан бери мамлакат энергетика иншоотларига қилинган энг йирик зарба бўлди.
Изоҳ (0)