Россия нефть нархига чегара жорий этган давлатларга хом ашё сотишни режалаштирмаяпти — Новак

Россия нархларнинг юқори чегарасини жорий қиладиган мамлакатларга нефть ва нефть маҳсулотларини етказиб беришни режалаштирмаяпти. Бу ҳақда мамлакат бош вазир ўринбосари Александр Новакка таяниб «РБК» хабар бермоқда.

Россия жаҳон бозорига ишончли энергия етказиб берувчи мақомини ва шериклар билан муносабатлардаги бозор ҳолатини тасдиқлайди. Шу муносабат билан биз нефть маҳсулотлари нархларнинг чегаравий тамойилини қўллайдиган мамлакатларга етказиб беришни режалаштирмаяпмиз, — деди Бош вазир ўринбосари.

Унга кўра, мамлакат бунга кейинчалик хом ашёни ҳамкор бозорларга йўналтириб ёки ишлаб чиқаришни қисқартириб эришмоқчи.

Новак, шунингдек, энергетика секторини сиёсийлаштириш оқибатида ресурсларнинг танқислиги ва энергия таъминоти билан боғлиқ муаммолар бўлиши мумкинлигини таъкидлади, чунки бу нефть бозори фаолиятининг тамойилларини бузишга, инвестициялар ҳажмининг пасайишига ва таклифнинг қисқаришига сабаб бўлади.

G7 давлатлари сентябрь ойидан Россия нефть маҳсулотлари учун максимал нархларни жорий этишга келишиб олган. Чекловлар Россиянинг даромадларини камайтириш ва Украина ҳудудидаги урушни молиялаштириш қобилиятига таъсир қилиш мақсадида киритилади.

Шунингдек, бундай қадамлар урушнинг жаҳон энергия нархларига таъсирини юмшатиши керак.

Мавзуга доир:

• G7 давлатлари 23 ноябрь куни Россия нефти нархининг максимал даражасини эълон қилмоқчи — Bloomberg;
• Европа Иттифоқи Россия нефтига юқори нарх чегарасини белгилашга тайёрлиги маълум қилинди.