Germaniya Polsha bilan uning havo hududida patrullik qilish haqida kelishib oldi. Bu haqda Germaniya mudofaa vaziri Kristina Lambrext polshalik hamkasbi Mariush Blashchak bilan muzokaralardan keyin ma’lum qildi, deb yozadi “RBK”.
Uning aytishicha, Germaniya Polshaga Patriot raketa majmualarini yuboradi, Polsha havo hududi xavfsizligini ta’minlash uchun esa Eurofighter qiruvchilari jalb etiladi.
Lambrext Polshani Germaniyaning do‘sti va ittifoqchisi deb atadi hamda bu mamlakat Ukrainaning qo‘shnisi sifatida “unchalik qattiq himoyalanmagani”ni aytdi.
15-noyabr kuni Polsha OAVlari Ukraina bilan chegara yaqinidagi Lyublinsk viloyatining Pshevoduv qishlog‘iga ikkita raketa qulagani haqida xabar berdi. Raketalardan biri elevatorga kelib tushdi, oqibatda ikki kishi halok bo‘ldi. Shu kuni Rossiya Ukraina hududiga yoppasiga raketa zarbasi bergandi.
Ukraina hukumati Polshadagi hodisada Rossiyani javobgar qildi. Moskva ayblovlarni rad etmoqda. G‘arb mamlakatlari va Polsha hukumati raketa Ukrainaga tegishli bo‘lgani haqidagi versiyaga moyillik bildirmoqda. Polsha prezidenti Anjey Duda “baxtsiz hodisa” yuz berganini taxmin qildi. Uning so‘zlariga ko‘ra, katta ehtimol bilan, qulagan raketa Ukraina havo hujumiga qarshi mudofaasi tomonidan qo‘llanilgan.
AQSH, Germaniya va Buyuk Britaniya ham Polsha raketa qulashi bilan bog‘liq hodisa uchun yakunda Ukraina bilan urush boshlagan va mamlakat fuqarolik infratuzilmasini o‘qqa tutgan Rossiya mas’ul ekanligi haqidagi bayonotlar bilan chiqdi.
Shundan keyin Lambrext Ukraina raketasining Polshaga qulashi Yevropa havo hujumidan mudofaa tizimidagi kamchiliklarni ochib berganini aytgan va NATO havo hujumidan mudofaa tizimini takomillashtirishga chaqirgan edi.
Izoh (0)