Суперлига 2023 йилги мавсумига йўлланма олган иккинчи жамоа ва ўтиш ўйинида иштирок этадиган клуб номи маълум бўлди

Футбол бўйича Ўзбекистон Про-Лигасида сўнгги тур ўйинлари 21 ноябрь, душанба куни бўлиб ўтди.

Унда «Турон» ўз майдонида «Андижон»ни 4:0 ҳисобида мағлуб этган бўлса, «Хоразм» ва «Бухоро» жамоалари ўртасидаги ўйин 2:2 ҳисобидаги дуранг билан якун топди.

Шу тариқа «Бухоро» ва «Турон» мавсум якунларига кўра бир хил — 50 очкодан тўплади. Ўзаро ўйинлардаги устунлик бўйича «Бухоро» иккинчи ўринни қўлга киритди. «Турон» эса учинчи ўринда якунлади.

Шу тариқа «Бухоро» Суперлига 2023 йилги мавсумига тўғридан-тўғри йўлланмани қўлга киритди. «Турон» эса ўтиш ўйинида Суперлига 2022 йилги мавсумида 12-ўринни қўлга киритган «Локомотив»га қарши майдонга тушади.

«Турон» ва «Локомотив» жамоалари ўртасидаги ўйин 25 ноябрь, жума куни Яйпандаги «Ўзбекистон» стадионида бўлиб ўтади.

Аввалроқ «Андижон» муддатидан аввал Суперлига йўлланмасига эга чиққанди. «Динамо» ва «Қўқон-1912» Про-Лигага равона бўлган.