Қозоғистоннинг амалдаги президенти Қосим-Жўмарт Тўқаев 20 ноябрь куни бўлиб ўтган президентлик сайловида ғалаба қозонди. Бу ҳақда Kazinform хабар берди.
«Очиқ жамият» халқаро минтақавий тадқиқотлар институти маълумотларига кўра, Тўқаев 82,45 фоиз, «Amanat» партиясининг Давлат сиёсати институти маълумотларига кўра – 85,52 фоиз овоз тўплади. «SOCИС-А" кенг қамровли ижтимоий тадқиқотлар институтида бу кўрсаткич 82,02 фоизни ташкил қилмоқда.
Респондентларга президентликка номзодлардан қайси бирига овоз бергансиз, деган саволга қуйидагича жавоб олинди.
- Каракат Абден – 2,54фоиз;
- Нурлан Ауесбаев – 2,17 фоиз;
- Жигули Даирабоев – 3,33 фоиз
- Мейрам Кажикен – 2,23 фоиз
- Салтанат Турсинбекова – 2,08фоиз
- Қосим-Жўмарт Тўқаев – 82,45 фоиз
- Ҳамма номзодга қарши – 5,2 фоиз.
Ўз навбатида, Элбоши Нурсултон Назарбоев биринчилардан бўлиб, Тўқаевни сайловдаги ғалабаси билан табриклади.
«Сизни Қозоғистон республикаси президенти сайловидаги ишончли ғалабангиз билан чин қалбимдан табриклайман! Бу ғалаба давлат раҳбари сифатидаги юксак нуфузингиздан далолат беради ва амалга ошираётган кенг кўламли ислоҳотлар ва янги ташаббусларингизга халқнинг сўнмас ишончи исботидир. Ҳамиша халқнинг қўллаб-қувватлаши ва ҳурматидан баҳраманд бўлишингизни тилайман», — дейди Назарбоев.
Қосим-Жўмарт Тўқаев президентлик сайлови қонунга мувофиқ ва ҳалол рақобат шароитида ўтказилганини қайд этди.
Изоҳ (0)