Франция пойтахти Париж шаҳрида 18—19 ноябрь кунлари ўзбек-француз бизнес форуми бўлиб ўтмоқда. Тадбир доирасида бир қатор амалдорлар ва инвесторлар Ўзбекистонга сармоя киритиш борасидаги фикрлари билан ўртоқлашди.
Жумладан, Франция савдо вазири-делегати, Ўзбекистон—Франция ишбилармонлар кенгаши раиси Оливер Бешт бизнес-форумнинг очилишида сўзлаган нутқида Ўзбекистонда амалга оширилаётган ўзгаришларга тўхталди.
«Бугун Ўзбекистон пухта ўйланган ривожланиш стратегияси билан машҳур бўлиб, унинг самарадорлиги турли соҳа ва тармоқлардаги компаниялар эътиборини тортмоқда. Айтишим керакки, бу ерда имкониятлардан кўра кўпроқ – сўнгги йилларда амалга оширилган кенг кўламли ислоҳотлар иқтисодиётни дунёга очиш ва уни хорижий инвесторлар учун янада жозибадор қилиш имконини берди. Бу ислоҳотлар иқтисодиётнинг барқарор ўсиш суръатларини таъминлашда нафақат ижобий самара берди, балки саноатнинг турли тармоқларини модернизация қилишга ҳам туртки бўлди.
Бошқача айтганда, Ўзбекистон ва Франция ўртасидаги ўзаро ҳамкорликнинг мавжуд салоҳияти икки мамлакат аҳолиси манфаатларидан келиб чиққан ҳолда иқтисодиётнинг барча муҳим тармоқларини қамраб олиши мумкин.
Бизнинг мақсадимиз — саъй-ҳаракатларни бирлаштириш ва янги лойиҳалар яратиш, бизнесни янада ривожлантириш масаласига конструктив ечим топишга қаратилган мулоқотни рағбатлантиришдир», — дейди Оливер Бешт.
Изоҳ (0)