Сенатнинг 35-ялпи мажлисида айрим қонун ҳужжатларига маҳкумларнинг ҳуқуқлари ва қонуний манфаатларини ишончли ҳимоя қилишга қаратилган ўзгартиш ва қўшимчалар киритишга оид қонун муҳокама қилинди. Бу ҳақда «Дарё» мухбири хабар бермоқда.
Мажлисда сенатор Толибжон Мадумаров нутқ сўзлаб, қонунда маҳкумларга бир қатор имкониятлар яратилаётганини айтди.
Қонун 5 та моддадан иборат бўлиб, «Фуқароларнинг давлат пенсия таъминоти тўғрисида»ги қонунга ва Жиноят-ижроия кодексига озодликдан маҳрум этишга ҳукм қилинган шахсларнинг умумий меҳнат стажига ишланган ҳамда ижтимоий солиқ тўланган даврни қўшиб ҳисоблашни назарда тутувчи ўзгартириш ва қўшимчалар киритилмоқда.Қонун сенаторлар томонидан маъқулланди.Қонунда озодликдан маҳрум этишга ҳукм қилинган шахсларнинг жазони ижро этиш муассасаларида жазони ўташ даврида бажарган ҳар қандай иши муассаса томонидан ижтимоий солиқ тўланган тақдирда стажга қўшиб ҳисобланиши кўрсатилмоқда. Бу орқали маҳкумлар келгусида пенсия олиш имкониятига эга бўлади.
Маҳкумларга нисбатан ғайриинсоний ёки қадр-қимматини камситувчи муомала ёки жазо турларини қўлланишига йўл қўйилмаслиги белгиланмоқда.
Маҳкумларнинг таржимон билан бир қаторда, сурдо таржимон хизматидан фойдаланишига ҳам рухсат берилмоқда.
Маҳбусларга нисбатан тинчлантириш кўйлагини қўллаш мумкин эмаслиги белгиланмоқда.
Биринчи ва иккинчи гуруҳ ногиронлиги бўлган маҳкумларнинг яшаш майдонини 2,5 метр квадратдан 3 метр квадратгача ошириш ҳамда умумий турур жойларни махсус мосламалар билан жиҳозланган бўлиши назарда тутилмоқда.
Маҳкумларнинг тузалиш йўлига ўтганини баҳоловчи қатъий мезонлар белгилаш орқали уларни рағбатлантириш масалалари, озодликдан маҳрум этишга ҳукм қилинган шахслар ишдан бўш соатлар ва тунги дам олиш вақтидан ташқарида бемалол кинофильм ва телекўрсатувлар кўриши мумкинлиги аниқ белгилаб берилмоқда.
Толибжон Мадумаров, сенатор.
Аввалроқ Сенат «Давлат божи тўғрисида»ги қонунга ўзгартириш ва қўшимчалар киритилишини маъқуллагани хабар қилинганди.
Изоҳ (0)