Қашқадарё ҳокимининг финляндиялик маслаҳатчиси вилоятдаги мактабларда Финляндия тажрибасини амалиётга татбиқ этишга киришгани хабар берилганди. Вилоят ҳокимлиги ахборот хизмати раҳбари Аҳрор Содиқовнинг «Дарё»га билдиришича, мазкур ташаббус АҚШдаги мутахассисларни ҳам қизиқтириб қўйган.
2022 йилнинг 8 ноябридан Қашқадарё вилоятида Финляндия ўқув методикасини жорий этиш бўйича «тажриба-синов» жараёнлари бошланганди. Ҳозирда ўқитувчиларни Фин ўқув методикаси асосида тайёрлаш бўйича тренинглар ўтказилмоқда. Вилоят ҳокими маслаҳатчисининг мазкур ташаббусига халқаро ташкилотлар томонидан ҳам қизиқиш билдирилмоқда, — дейди Аҳрор Содиқов.
Таъкидланишича, 16 ноябрь куни Муроджон Азимовнинг халқ таълими тизимини ривожлантириш бўйича маслаҳатчиси Петри Лунаскопри АҚШ Тараққиёт агентлигининг (USAID) Ўзбекистондаги ваколатхонаси билан икки томонлама учрашув ўтказган.
Музокараларда АҚШ Тараққиёт агентилигининг (USAID) Ўзбекистондаги миссияси директори в.б. Луанн Гронховд ва бошқа масъуллар иштирок этди. Тадбирда маслаҳатчи томонидан Қашқадарё вилоятида амалга оширилаётган «тажриба-лойиҳа» бўйича маълумот берилди ҳамда ҳамкорлик истиқболлари муҳокама қилинди. Хориж томон вакиллари яқин кунларда Қашқадарё вилоятига ташриф буюриб, жараённи бевосита кузатиши тўғрисида хабардор қилинди, — дейди вилоят ҳокимлиги ахборот хизмати раҳбари.
Қўшимча қилинишича, 2023 йилнинг 10 январидан бошлаб туман ва шаҳарларда 1 тадан мактабларда (12 134 нафар ўқувчи ва 882 нафар ўқитувчи), 1 сентябрдан қўшимча 2 тадан 32 та мактабларда тажриба-синовлар ўтказилади.
Финляндиялик профессорнинг Қашқадарё ҳокимига маслаҳатчи этиб тайинланиши орқали вилоятдаги мактабларда Финляндия тажрибасини оммалаштириш мақсад қилинган.
Мавзуга доир: Қашқадарёда хитойликлар билан ҳамкорликда осма дор йўллар қурилади
Изоҳ (0)