Qashqadaryo hokimining finlyandiyalik maslahatchisi viloyatdagi maktablarda Finlyandiya tajribasini amaliyotga tatbiq etishga kirishgani xabar berilgandi. Viloyat hokimligi axborot xizmati rahbari Ahror Sodiqovning “Daryo”ga bildirishicha, mazkur tashabbus AQSHdagi mutaxassislarni ham qiziqtirib qo‘ygan.
2022-yilning 8-noyabridan Qashqadaryo viloyatida Finlyandiya o‘quv metodikasini joriy etish bo‘yicha “tajriba-sinov” jarayonlari boshlangandi. Hozirda o‘qituvchilarni Fin o‘quv metodikasi asosida tayyorlash bo‘yicha treninglar o‘tkazilmoqda. Viloyat hokimi maslahatchisining mazkur tashabbusiga xalqaro tashkilotlar tomonidan ham qiziqish bildirilmoqda, — deydi Ahror Sodiqov.
Ta’kidlanishicha, 16-noyabr kuni Murodjon Azimovning xalq ta’limi tizimini rivojlantirish bo‘yicha maslahatchisi Petri Lunaskopri AQSH Taraqqiyot agentligining (USAID) O‘zbekistondagi vakolatxonasi bilan ikki tomonlama uchrashuv o‘tkazgan.
Muzokaralarda AQSH Taraqqiyot agentiligining (USAID) O‘zbekistondagi missiyasi direktori v.b. Luann Gronxovd va boshqa mas’ullar ishtirok etdi. Tadbirda maslahatchi tomonidan Qashqadaryo viloyatida amalga oshirilayotgan “tajriba-loyiha” bo‘yicha ma’lumot berildi hamda hamkorlik istiqbollari muhokama qilindi. Xorij tomon vakillari yaqin kunlarda Qashqadaryo viloyatiga tashrif buyurib, jarayonni bevosita kuzatishi to‘g‘risida xabardor qilindi, — deydi viloyat hokimligi axborot xizmati rahbari.
Qo‘shimcha qilinishicha, 2023-yilning 10-yanvaridan boshlab tuman va shaharlarda 1 tadan maktablarda (12 134 nafar o‘quvchi va 882 nafar o‘qituvchi), 1-sentabrdan qo‘shimcha 2 tadan 32 ta maktablarda tajriba-sinovlar o‘tkaziladi.
Finlyandiyalik professorning Qashqadaryo hokimiga maslahatchi etib tayinlanishi orqali viloyatdagi maktablarda Finlyandiya tajribasini ommalashtirish maqsad qilingan.
Mavzuga doir: Qashqadaryoda xitoyliklar bilan hamkorlikda osma dor yo‘llar quriladi
Izoh (0)