Finlyandiyalik professor Qashqadaryo hokimiga maslahatchi bo‘ldi. U viloyatdagi maktablarda Finlyandiya tajribasini ommalashtiradi
Finlyandiyadagi Savoniya universiteti professori Petri Lunaskopri Qashqadaryo hokimi Murodjon Azimovning ta’lim tizimidagi maslahatchisi sifatida ish boshladi. Bu haqda “Daryo”ga viloyat hokimligi axborot xizmati rahbari Ahror Sodiqov xabar berdi.
Ma’lum qilinishicha, prezident rahbarligida 2022-yil 28-yanvar va 5-aprel kunlari o‘tkazilgan videoselektor yig‘ilishida berilgan topshiriqqa ko‘ra, Murodjon Azimov rahbarligidagi jamoa Toshkent shahridagi Xalqaro Nordik universiteti bilan hamkorlikni yo‘lga qo‘ygan. Xalq ta’limi tizimini takomillashtirish va o‘qituvchilar malakasini oshirish maqsadida Finlyandiyadan mutaxassis jalb qilgan.
“Mazkur mutaxassis Finlyandiyaning Amaliy fanlar bo‘yicha Savoniya universiteti professori Petri Lunaskopri bo‘lib, u 20 dan ortiq davlatlarda K12 Oliy ta’lim bo‘limining o‘qitish xizmatlarida trener sifatida tajribaga ega. U pedagogika fanlari doktori va pedagogika yo‘nalishida xalqaro darajadagi mutaxassis hisoblanadi. Finlyandiyadan tashqari Niderlandiya, Angliya, Portugaliya va Vengriya davlatlarida ishlagan. Finlyandiya ta’limi rivojlanishiga turtki bo‘lgan ta’limni isloh qilish konsepsiyasi muallifi hamdir”, — deydi Ahror Sodiqov.
Aytilishicha, yangi maslahatchi O‘zbekistondagi xalq ta’limi tizimi bo‘yicha ham muayyan tajriba va ma’lumotlarga ega. Jumladan, mutaxassis joriy yil 15—19-may kunlari “Ta’limdagi o‘qitish metodikalari bo‘yicha Finlyandiya tajribasi” mavzusida respublikada treninglar o‘tkazgan.
“Mutaxassisni bir yil muddatga oylik maosh evaziga xalq ta’limi tizimiga jalb qilish orqali, uning mahoratidan viloyat xalq ta’limini rivojlantirish bo‘yicha uch yillik mahalliy dasturini ishlab chiqish, tuman (shahar) xalq ta’limi bo‘limlaridagi ikki nafar metodistni Finlyandiya ta’limi tajribasi bo‘yicha tayyorlash, viloyat pedagoglarini yangi metodikalarga o‘rgatish Milliy markazi faoliyatini takomillashtirish ishlarini rivojlantirish maqsad qilingan”, — deydi Ahror Sodiqov.
Qo‘shimcha qilinishicha, xorijlik mutaxassis viloyatdagi faoliyati davomida reytingda past natija ko‘rsatgan maktablarda treninglar o‘tkazadi. O‘qituvchilarning dars berish jarayonini kuzatadi. Maktablarda o‘qituvchilarning o‘z ustida ishlashini rag‘batlantiradigan tizim yaratadi.
“Davlatimiz rahbari tomonidan xalq ta’limi yo‘nalishida o‘tkazilgan yig‘ilishlarda aynan Finlyandiya misol qilib ko‘rsatilgan. Ushbu mamlakat ta’lim sifatini baholash bo‘yicha o‘tkazilgan xalqaro tadqiqotlarda o‘z muvaffaqiyatlari bilan ajralib turadi. Fin o‘quvchilari ta’lim sifatini baholash bo‘yicha tadqiqotidagi barcha yo‘nalishlarda savodxonlik ko‘rsatkichlari bo‘yicha eng yaxshi natijalarga erishib kelmoqda. O‘z navbatida, finlyandiyalik mutaxassisning viloyatimizdagi faoliyati davomida oliygohlar talabalari bilan ham ochiq muloqotini tashkil qilish rejalashtirilgan. Bundan tashqari, tez orada fin mutaxassisi salohiyati bilan umumta’lim tizimidagi o‘qituvchilarning ko‘pchilik qismini qamrab olish va o‘ziga xos muloqot maydonini yaratish maqsadida, telegram bot ham ishga tushiriladi. Viloyatimiz o‘qituvchilari xalq ta’limini rivojlantirish bo‘yicha bevosita g‘oyalar, takliflar va murojaatlar (ingliz tilida) yo‘llashlari ham mumkin”, — deydi mas’ul.
