Apple асосчиси ва ихтирочи Стив Жобс ўзининг муваффақиятли карьерасини қуриш учун ишга шўнғиб кетганига қарамай, ҳеч қачон ёлғиз яшамаган — у кўп болали ота эди. Қуйида унинг учта қизи ва ўғли нимага эришганлиги ҳақида маълумот берамиз.
Лиза Бреннан-Жобс
Стив Жобснинг биринчи фарзанди ва муносабатларида қийинчилик бўлган қизи. Тадбиркор узоқ вақт давомида қиз уники эмаслигини рад этиб, бепушт эканлигини ва собиқ севгилиси унинг бойлигига эга чиқмоқчи эканлигини айтган.
Кейинчалик Лизани ўз қизи сифатида қабул қилган Стив Жобс туфайли қиз отасидан яхшигина молиявий ёрдам олади. Бир неча йил давомида Лиза отасининг уйида яшайди, унинг ҳисобидан Гарвард университетида ўқийди. Худди шу таълим муассасасида у журналистикага қизиқиб қолади ва шун кунгача мазкур соҳада фаолият олиб боради. Лиза Лондон Қироллик коллежида ҳам бир йил ўқийди.
Бреннан-Жобс ўзининг ёзувчилик қобилиятини юзага чиқара олди: у ўз ҳикояларини Vogue, Los Angeles Times, The Southwest Review, О: The Oprah Magazine каби Американинг машҳур оммавий ахборот воситаларида нашр эттирган.
2018 йилда Vanity Fair журнали унинг «Кичик балиқ: Ҳаётим ҳикояси» деб номланган китобидан парча бергандан кейин Лиза машҳур бўлиб кетди. Китобда миллиардернинг қизи отаси билан илиқ муносабатлар ўрнатиш учун қандай қийинчиликларга дуч келгани, унинг оиладаги ғалати хатти-ҳаракатлари ҳақида ҳикоя қилади.
Лиза отаси берган пулларни ўзини ривожлантириш учун моҳирлик билан ишлатган, шунинг учун у нафақат Стив Жобснинг қизи, балки ёзувчи ва журналист сифатида ҳам танилган.
Бугунги кунда 44 ёшли Бреннан-Жобс Бруклинда турмуш ўртоғи Билл ва эрининг олдинги турмушидан бўлган ўғли ва икки қизи билан яшайди.
Рид Жобс
Apple асосчисининг ягона ўғли ва фарзандлари ичида унинг энг севимлиси бўлган, Жобс буни бошқа болаларидан яширмаган ҳам ҳатто.
Стив Жобс ҳар доим қизларига эмас, балки ўғлига ёрдам беришни афзал кўрган, бу Риднинг онкологияга қарши кураш масаласини ўрганиш истагида акс этган. Унинг отаси ошқозон ости бези саратонидан вафот этади. Жобсга қаттиқ боғланган Рид отасининг соғайиб кетишига ҳисса қўшишни хоҳларди, аммо улгурмади. Бироқ бугунги кунда у саратон касаллигининг олдини олиш бўйича тадқиқотлар билан шуғулланади.
Рид тиббиёт соҳасига ўрта мактабдан қизиқа бошлаган, у ҳатто Стенфорд университетидаги битирув нутқини онкология бўйича қилган. 2015 йилдан кейин у Калифорния соғлиқни сақлаш ташкилоти Эмерсон Cоллеcтиведа ишлай бошлайди. Рид ҳозирда у ерда саратон тадқиқотлари ва даволаш бўйича директор лавозимида ишлайди.
Кичик Жобс рус мураббийи Георгий Погосов раҳбарлигида таҳсил олиб, қиличбозлик бўйича ҳам муваффақиятга эришган. У бу соҳада профессионал даражада танилмади, гарчи Погосовнинг сўзларига кўра, унинг бунга имконияти бор эди.
2022 йилнинг февралида 30 ёшли Рид Жобс тез орада лавозимини тарк этиши керак бўлган Вакиллар палатаси спикери Нэнси Пелоси ўрнига номзодини қўйишга қарор қилгани маълум бўлди.
Шахсий ҳаёти ҳақида гапиришни хоҳламайдиган Рид журналистлар билан мулоқот қилмасликни афзал кўради.
Эрин Сиэнна Жобс
Стив Жобснинг учинчи фарзанди ва оммага яхши таниш бўлмаган қизи.
Болалигидан ота-онаси томонидан эътибор ва меҳр кўрмаган Эрин худди отасининг ёшлигидек одамови ва шахсий муносабатларга қизиқмайдиган бўлиб ўсган.
Оилавий муносабатлардаги масофа ва жамоатчиликдан узоқроқ туриши туфайли Эрин ҳақида маълумотлар жуда кам. Акаси сингари у ҳам Стенфорд университетини тамомлаган, ўқиш даврида архитектура ва дизайнга қизиқиб қолган. У ҳали ҳам бу соҳаларга қизиқади.
Эрин ижтимоий тармоқларда фаол эмас. Аммо унинг аккаунти сақланиб қолган, шундан маълум бўлишича, ҳозирда 27 ёшли қиз Ню-Орлеанда яшайди.
Ева Жобс
Ева Жобс — миллиардернинг бугунги кунда машҳурликда катта қизи Лизани ортда қолдирадиган кенжа қизи.
Оиланинг бошқа аъзолари сингари Ева ҳам Стенфорд университетида таҳсил олган, аммо ўқиши ва ноодатий ҳаёти уни ҳеч қачон ҳайратда қолдирмаган. Қиз от спортида ўзини синаб кўришга қарор қилиши биланоқ ўзининг феъл-атворини кўрсатади. Айтганча, бу соҳада у катта муваффақиятларга эришган: 2017 йилда Ева «Ойнинг энг яхши чавандози» номинациясида ғолиб бўлади. Унинг онаси Лорен ҳатто Евага машқ қилиш учун ранчо сотиб олган.
Ака-опаларидан фарқли ўлароқ, Ева нафақат ҳаётда, балки интернетда ҳам жуда фаол. Унинг ижтимоий тармоқларда 200 000 дан ортиқ обуначиси бор.
Моделлик Ева Жобс учун ўзини ўзи англаш соҳасига айланди. 23 йил давомида у кўплаб муваффақиятли шоу ва тадбирларда иштирок этди. Франциянинг Copeрни мода брендининг мода кўргазмасидаги дебюти, Louis Vuitton аёллар кийимлари намойиши, Глоссиэр гўзаллик брендининг байрам акциясида иштирок этиш шулар жумласидан.
Яқинда Ева DNA Model Management номли моделлаштириш агентлиги билан шартнома имзолади, бу унинг келажаги профессионал қўлларда эканлигини англатади. Ахир, компания Ева Герсигова, Наталя Водянова, Линда Евангелиста, Аня Рубик каби машҳурларни дунёга танитган.
Бир пайтлар Стив Жобс ҳазиллашибми ёки йўқми, кенжа қизига алоҳида умид боғлаб, у қачондир Apple’ни бошқаришини айтганди.
Мавзуга доир:
Изоҳ (0)