Илон Маскнинг Twitter’даги ғоялари туфайли корпорациялар миллиардлаб доллар йўқотди

Илон Маскнинг Twitter’да верификация белгисини ойига 8 долларга сотиш ғояси баъзи АҚШ компанияларига бозор капиталлашувини йўқотиб, миллиардлаб доллар зарар келтирди. Бу ҳақда CNBC хабар бермоқда. 

Ижтимоий тармоқда сохта корпоратив аккаунтлар пайдо бўлди, уларда сохта маълумотлар тарқала бошлади, бу эса акциялар қийматининг пасайишига олиб келди. 

Ўтган пайшанба, 10 ноябрь куни, Америка фармацевтика компанияси Eli Lilly’нинг сохта аккаунтида «инсулин энди бепул» деб хабар берилди. 

Шундан сўнг, инсулин ишлаб чиқарувчи барча фармацевтика компанияларининг биржа котировкалари 4-5 фоизга тушиб кетди. Eli Lilly’нинг ўзидан ташқари Ново Нордиск ва Sanofi ҳам жабр кўрди.

11 ноябрь куни Lockheed Martin мудофаа корпорацияси учун сохта аккаунт яратган номаълум фойдаланувчи компания ушбу мамлакатларда инсон ҳуқуқлари бузилгани сабабли АҚШ, Саудия Арабистони ва Исроилга қурол сотишни тўхтатаётгани ҳақида ёзди. 

Компания акцияларининг котировкалари шу заҳотиёқ 5,5 фоизга тушиб кетди, бу мудофаа гигантининг бозор капиталлашувини 7 миллиард доллардан кўпроққа қисқартирди. 

Raytheon ва General Dynamics каби бошқа мудофаа компанияларининг қимматбаҳо қоғозлари ҳам арзонлашди.

Шу куни, 11 ноябрда бошланган норозиликлар натижасида Илон Маск верификация белгисини пулга сотиш амалиётини тўхтатишга қарор қилди.