Ўзбекистон Республикаси президенти Шавкат Мирзиёев 16 ноябрь куни Хорижий инвесторлар кенгашининг биринчи мажлиси доирасида Cengiz Enerji компанияси бошқаруви раиси Мехмет Чингиз билан учрашди.
Давлат раҳбари бугунги кунда Тошкент ва Сирдарё вилоятларидаги энергетика қувватларини кенгайтириш бўйича муҳим лойиҳаларни амалга оширишда иштирок этаётган ушбу турк компаниясининг фаолиятини юқори баҳолади.
Бошланган лойиҳаларни тез фурсатда якунига етказиш ҳамда устувор йўналишларда, шу жумладан энергетика объектларини модернизация қилиш ва транспорт инфратузилмасини ривожлантиришда ўзаро манфаатли ҳамкорликни янада кенгайтириш муҳим экани таъкидланди.
Мехмет Чингиз самимий қабул ҳамда хорижий инвесторларнинг самарали фаолиятига яратилаётган шароитлар учун Ўзбекистон президентига миннатдорлик изҳор этди. Мамлакатда муҳим инфратузилмавий лойиҳаларни амалга оширишда бундан буён ҳам иштирок этишга тайёрлигини билдирди.
Аввалроқ Шавкат Мирзиёев «Кўксарой»да EТТБ президенти билан ҳамкорликни кенгайтириш масаласини кўриб чиққани хабар берилган эди.
Изоҳ (0)