Бухорода режа асосида қўлланадиган электр энергиясини чеклаш графиги ижтимоий тармоқларда тарқалиб, турли муҳокамаларга сабаб бўлди. Унда ёқилғи ва қувват танқислиги юзага келганда қўлланадиган навбатма-навбат чекловлар акс этган. «Бухоро ҳудудий электр тармоқлари корхонаси» бунга изоҳ берди.
Қайд этилишича, электр энергиясини ишлаб чиқариш ва уни истеъмол қилиш бир вақтга тўғри келади. Шунинг учун электр энергияси захирасини яратиш имконсиз. Шу сабабли энерготизимда ёқилғи ва қувват танқислиги юзага келган вақтларда электр энергияси балансини таъминлаш ҳамда энергетика тизимида оғир оқибатли йирик фавқулодда аварияли ҳолатлар юзага келишининг олдини олиш мақсадида ҳудудларда эҳтимолий чеклов графиклари шакллантирилган.
«Таъкидлаш жоизки, бундай чеклов графикларига фақатгина зарурий ҳолларда, тизимда қувват танқислиги кузатилган вақтлардагина амал қилинади. Тизим меъёрий ҳолатга келган вақтларда чеклов графиги қўлланмайди ва электр энергиясини узлуксиз равишда етказиб берилиши таъминланади», — дейилади хабарда.
«Бухоро ҳудудий электр тармоқлари корхонаси» электр энергияси истеъмолчиларидан ушбу вазиятни тўғри тушунишга ва тармоқларда юзага келиши мумкин бўлган йирик аварияларни олдини олиш ҳамда энергия ресурслари барқарорлигини таъминлаш мақсадида имкон қадар ушбу ресурслардан оқилона, тежамкорлик билан фойдаланишга чақирди.
Мавзуга доир:
- Ўзбекистон энерготизимида оғир оқибатли «авария» – блекаут хавфи борлиги маълум қилинди
- «Ҳар куни электр энергиясини тежаш кунини нишонлаяпмиз». Наманганликлар Энергетика вазирлигидан ҳафсаласи пир бўлганини айтмоқда (видео)
- «Симёғочлар қулаб тушиб, ток уриш хавфи бор, йўллар абгор». Андижоннинг Булоқбоши туманида яшовчи аҳоли муаммолар гирдобида яшамоқда
Изоҳ (0)