Давлат божхона қўмитаси раиси Акмалхўжа Мавлонов ҳузурида бўлиб ўтган навбатдаги хизмат йиғилишида шахсан раис томонидан бир неча бор огоҳлантиришларга қарамасдан, тизимда ҳанузгача коррупцияга қўл ураётган ходимлар учраётгани танқид остига олинди ва 5 нафар ходим ишдан бўшатилди.
Таъкидланишича, улар божхона органларининг тезкор тузилмалари томонидан 5—6 ой давомида тезкор кузатувга остига олинган. Жумладан, Тошкент вилояти божхона бошқармаси «Ойбек» чегара божхона постида 2022 йилнинг июнь сентябрь ойларида олиб борилган тезкор ўрганиш ишлари натижасида олиб чиқилиши тақиқланган товарлар ортилган юк автотранспорт воситаларини ҳужжатларда гўёки бўш ҳолатда дея кўрсатган ҳолда олиб чиқилганлигига доир факт ва далиллар аниқланган.
Йиғилишда қўмита раиси мазкур ҳолат юзасидан божхона органлари томонидан жиноят иши қўзғатилганини маълум қилди. «Ойбек» чегара божхона пости бошлиғи ўринбосари ва 3 нафар ходими шу куннинг ўзида божхона органларидан бўшатилди ва тергов органларига топширилди.
Шунингдек, 15 ноябрь тунги соат 3:30 да «Тошкент-АЭРО» ихтисослаштирилган божхона комлпекси «Тошкент халқаро аэропорти» чегара-божхона постида аниқланган товар-моддий бойликларни ноқонуний олиб киришга уриниш ҳолати ҳам йиғилишда кескин танқид остига олинди. Натижада мазкур пост смена бошлиғи ҳам божхона органларидан бўшатилди.
Божхона органлари тезкор тузилмалари томонидан Фарғона вилоятида аниқланган навбатдаги салбий ҳолатда эса товарларни «реекспорт» қилмасдан, ички ҳудудда олиб қолинишига шароит яратиб берган ходимлар қилмиши танқид қилинди. Мазкур ҳолатга алоқадор «Қўқон» ТИФ божхона постининг 1 нафар ходими божхона органларидан бўшатилди ва ҳолатга алоқадар бир қатор ходимлар интизомий жазога тортилди.
Изоҳ (0)