Ижтимоий тармоқларда ўқитувчилар томонидан ҳудуддаги хонадонларда яшовчи мактаб ёшидаги болалар ҳақида маълумотлар йиғилаётгани ҳақида хабар тарқалгач, Масс-медиа фонди Васийлик кенгаши раиси ўринбосари Саида Мирзиёева ҳолат юзасидан ўз фикрларини билдирган ва барча масъуллардан ўқитувчиларни дарс беришдан бошқа барча вазифалардан озод қилишини сўраган эди. «Менимча» кўрсатувида ушбу масалага ҳам тўхталиб ўтилди.
Унда таъкидланишича, Президент админстрацияси томонидан Халқ таълими вазирлиги ҳамда тегишли мутассаддиларга ўқитувчилар зиммасига юклатилган барча ортиқча вазифаларни инвентаризация қилиш ҳамда уларни тақиқлаш юзасидан тегишли кўрсатма берилди.
Ҳамманинг фикри бир ерда туташади: таълим биз учун ҳаёт-мамот масаласи. Таълимнинг кучи ўқитувчининг билими ва фидойилигида. Шунинг учун ҳам президент энг кўп гапирадиган, кўп учрашадиган касб эгалари – устозлар бўлса керак.
Кейинги 5 йил учун танлаб олинган устувор йўналишлардан бири ҳам таълим. Ўқитувчи ва ўқувчи ўртасидаги энг катта билим кўприги эса бу дарсликлар. Ўқув йили бошланганига 1 чорак ўтган бўлса-да, ҳали ҳануз айрим мактабларда дарсликлар етишмовчилиги билан боғлиқ муаммолар борлигини тармоқларда ўқияпмиз. Яна кунда кунора дарсликлардаги мисол ва машқлардаги хатоликлар ҳақида ҳам ота-оналар ёзғириб қолишади, — дейилади унда.Таъкидланишича, Президент админстрацияси ҳузурида ташкил этилган ишчи гуруҳ ва Халқ таълими вазирлиги дарсликларни янгилаш, замонавий ўқув методикани ишлаб чиқиш бўйича ҳаракатларни бошлаган.
Математика бутун дунёда математика, физика ёки кимё қонунлари бутун дунёда бир хил. Дарсликлар сифати ва ўқитиш методикаси ҳар хил. Велосипедни қайта ихтиро қилмасдан 1-4-синф учун энг илғор халқаро тажрибалар ёрдамида ўз миллий дарсликларимизни яратамиз, 5-11-синфнинг миллий мафкурамизга боғлиқ қисмлари яни тарих, ўзбек тили, адабиёт кабиларини ўзимиз, табиий фанлар, яъни, физика, химия, биология, анатомия кабиларни эса энг зўр, тажрибада синалган, катта натижа берадиганини тайёрини олиб ўзимизга мослаштирамиз, дейишяпти. Ўтган ҳафта давомида 1-4-синф ўқувчилари учун яратилаётган ўқув дастурлари ва дарсликларни апробациядан ўтказиш учун танлаб олинган 14 та мактаб ўқитувчилари махсус тайёрлов курсини ўташди, — дейди бошловчи.
Янги дарсликлар тайёрлашда 4 К модели асос қилиб олинган бўлиб, булар — коллоборация, коммуникация, креативлик, критика.
Биз авваллари болаларнинг ёзувига кўпроқ эътибор қаратганмиз, диктантлар ёздирганмиз. Янги тажриба билан эса болаларнинг танқидий фикрлаши, ўз фикрини эркин баён эта олишига аҳамият берилади. Дейлик, 45 дақиқали дарсда болалар эътиборини 10 дақиқагина ўзимизга қарата оламиз, лекин янги методларда ўйинлар ўйнатиш, расмлар чиздиришга алоҳида эътибор берилмоқда, — дейди махсус тайёрлов курсини ўтаган ўқитувчилардан бири.
Яна бир ўқитувчи эса янги дарсликлар турли ўзлаштиришга эга ўқувчилар учун мослаштирилгани, қайсидир ўқувчи синфдошларидан ортда қолиб кетмаслигига эътибор қаратилгани ҳақида гапирди.
Шунингдек, фанлар бир-бирига шундай боғланганки, бир мавзуни она тили фанида ўтсак, математика фани мавзуси ҳам шунга бевосита боғланган. Технология фанида ҳам, тасвирий санъатда ҳам шу ҳолат. Бу орқали ўқувчилар берилаётган ахборотни тўлиқ ўзлаштира олади. Шу жиҳатдан қулайлик томонлари бизга жуда маъқул келди, — дейди у.
Курс якунида иштирокчи ўқитувчиларга махсус сертификатлар топширилди.
Изоҳ (0)