Britaniyalik ko‘cha rassomi Benksi “Bomba bilan quchoqlashish” va “Sevib qolgan kalamush” kartinalarining intellektual egalik huquqidan mahrum bo‘ldi. So‘nggi 10 oy ichida u jami oltita kartinasining egalik huquqidan ayrilgan. Bu haqda Yevropa Ittifoqi Intellektual mulk idorasi (EUIPO) qaroriga tayanib, Esquire xabar berdi.

Foto: Legion Media

Shunday qilib, rassom endilikda “Hozir kul” (2003-yil), “Radarli kalamush” (2004-yil), “Soyabonli qiz” (2008-yil) va “Ranglar irg‘ituvchisi” (2003-yil) kartinalarining mutlaq egasi bo‘la olmaydi. Tasvirlardan Yevropa Ittifoqi hududida bepul foydalanish mumkin.

Benksi “Bomba bilan quchoqlashish” va “Sevib qolgan kalamush” kartinalariga egalik huquqini otkritkalar ishlab chiqaruvchi Full Colour Black’ning da’vosiga ko‘ra qabul qilingan qaror bo‘yicha yo‘qotgan. Ikkala holatda ham patent idorasi kompaniya tarafini olgan va o‘z kartinalarini tovar belgisi sifatida ro‘yxatdan o‘tkazib, biroq uni sotish maqsadida bo‘lmagan rassomning harakatlarini “vijdonsizlik” deb atagan. Oqibatda Benksining vakillari 1850 funt miqdorida jarimaga tortilgan.

Ekspertlarning hisoblashicha, Benksi bahsli ishlarda mualliflik huquqini qo‘lga kiritish uchun shaxsini oshkor etishi kerak. Faqat shu orqali u o‘z kartinalarini hayotligi va o‘limidan keyingi 70 yil davomida saqlab qolishi mumkin.

Full Colour Black 2019-yili yuridik jarayonlarni boshlagan vaqtda Benksi yuristlar maslahatiga kirib, mualliflik huquqining buzilishidan himoyalanish maqsadida Londonda Gross domestic product nomli suvenirlar do‘konini ochgan va o‘z savdo markasi ostidagi tovarlarini sota boshlagan. Do‘kon kirish qismisiz ko‘rgazma zali ko‘rinishida bo‘lgan va bir necha hafta faoliyat yuritgan, shundan so‘ng u yerdagi ishlar maxsus sayt orqali sotuvga qo‘yilgan.

Avvalroq Nyu-Yorkda Benksining asari 95 ming dollarga sotib olingani va kriptovalyutaga aylantirish maqsadida yoqib yuborilgani to‘g‘risida xabar berilgandi.