Франция ақл билан тўғри йўл туцагина, Россия у билан муносабатларини нормаллаштиради. Бу ҳақда Россиянинг Франциядаги элчиси Алексей Мешковга таяниб, «Gazeta.ru» хабар берди.
Элчининг сўзларига кўра, икки давлат муносабатлар тарихидаги энг яхши даврни бошдан кечирмаяпти.
«Албатта, бу борада ижобий томондан гапиришнинг имкони йўқ. Лекин Москва, жумладан, ташқи ишлар вазири Сергей Лавров бир неча бор таъкидлаганидек, агар шерикларимиз ақл йўлига қайтса, биз улар билан гаплашишга тайёрмиз», — деди Мешков.
У Франциянинг Россияга қарши аниқ ва қатъий позицияси туфайли муносабатларнинг ҳозирги ҳолати паст даражада эканлигига эътибор қаратди. Дипломат, шунингдек, Париж Украинага «Цезарь» гаубицаларини етказиб беришда давом этаётгани, бу қуроллар орқали Донбассдаги тинч аҳоли ўққа тутилаётганини айтди.
«Франция ва Германия Нормандия форматида ишлаш имкониятига эга эди. Афсуски, улар керакли ҳаракатларни бажармади. Бугунги кунга қадар бундай уринишлар бўлмаган. Бошқа томонда, ғалла келишуви ва Запорожье атом электр станциясининг хавфсизлиги бўйича суҳбат кетмоқда», — дея хулоса қилди рус дипломати.
10 ноябрь куни франциялик сиёсатчи Зеленский режимини молиялаштиришни тўхтатишга чақирди. Россия Украинага бостириб киргандан буён Франция ва бошқа Ғарб давлатлари Украина Қуролли кучларини миллиардлаб долларлик қурол-яроғ билан таъминлади. Париж аллақачон Киевга 18 та CAESAR 155мм ўзиюрар артиллерия мосламаларини юборган.
Бундан ташқари, Франция президенти Эммануэль Макрон мамлакат расмийлари Дания билан биргаликда Украинага яна олтита худди шундай гаубица етказиб бериш устида иш олиб бораётганини айтди. Париж, шунингдек, Киевга радарлар, ҳаво ҳужумидан мудофаа тизимлари ва ракеталарни етказиб беришни режалаштирмоқда.
Изоҳ (0)