Буюк Британия Украинага яна 1000 та ер-ҳаво ракеталари, шунингдек, ҳарбийлар учун 25 000 қишки кийим тўпламларини юборади. Бу ҳақда Британия ҳукумати томонидан хабар қилинган телефон суҳбатида Қироллик бош вазири Риши Сунак Украина президенти Владимир Зеленскийга ваъда берган, деб ёзади «РБК».
Сунак ва Зеленский Украинани халқаро қўллаб-қувватлаш масаласини ҳам муҳокама қилди ва Украинанинг ғалла ва ўғитларини жаҳон бозорларига етказиб бериш бўйича яқин алоқани давом эттиришга келишиб олди.
Украина президенти Twitter орқали Сунак билан «қишки даврни енгиб ўтишда» Лондондан ёрдам кўрсатилишини муҳокама қилганини маълум қилди.
9 ноябрь куни Буюк Британия Мудофаа вазирлиги Украинага 1000 га яқин зенит-ракета мажмуасини етказиб беришни якунлаётганини хабар қилди. Аниқлик киритишича, гап ҳаводаги нишонларни уриб туширишга қодир бўлган ракеталар, жумладан дрон ва қанотли ракеталар ҳақида бормоқда.