Mazda Владивостокдаги корхона улушини 1 еврога сотди ва Россияни тарк этди

Mazda ўзининг молиявий ҳисоботида Владивостокдаги «Mazda Sollers Manufacturing Rus» МЧЖ қўшма корхонасидаги улушини Россиянинг Sollers Group компаниясига сотганини маълум қилди, деб хабар қилади Meduza.

Битим 24 октябрь куни ёпилган. Mazda қўшма корхонадаги ўз улушини рамзий суммага сотди — бир евро. Шартномада уч йил ичида улушни сотилган миқдорида қайтариб олиш ҳуқуқи сақлаб қолинган.

Компания тегишли органларнинг розилигини олгач, улушни «имкон қадар тезроқ» ўтказиш ниятида. Япония компанияси акцияларни ўтказишдан кўрилган зарарни 12 миллиард иен (82 миллион доллар) деб баҳолади.

Sollers’нинг маълумот беришича, гуруҳ Владивостокдаги қўшма корхонадаги Mazda улушини сотиб олиб, эҳтимол, 2023 йилда заводни янги модель линиясида қайта ишга туширади. Sollers аввалроқ бошқа маркадаги автомобилларни ишлаб чиқаришга келишиб олганларини тан олган эди.

Илгари SХ-5, SХ-9 ва Mazda6 моделлари Владивостокдаги заводда йиғилган. Март ойида, Украинада уруш бошланганидан сўнг, Mazda заводга эҳтиёт қисмлар етказиб беришни тўхтатган ва апрель ойининг охирида корхона ишини тугатган эди. «Компания Sollers билан музокараларни давом эттирган бўлса-да, бизнесни қайта очиш имкониятини кўрмади», — дейилади Mazda баёнотида.

Россиянинг Украинага бостириб киришидан кейин Ford, Mercedes-Benz, Renault ва Nissan каби автомобиль ишлаб чиқарувчилар Россия бозорини тарк этди.