Афғонистонда «Толибон» ҳаракати Кобул аҳолиси уйларига видеокузатув камералари ўрнатиши кераклигини маълум қилди. Бу ҳақда Hasht-e Subh Daily хабар берди.
Кобул полицияси вакили Холид Задран бу ҳаракатдан мақсад шаҳардаги хавфсизлик ҳолатини яхшилаш эканини айтди. У турли маҳаллаларда адвокатлар, масжид имомлари ва нуфузли шахслар билан ҳамкорликда кампания бошлангани ва ҳозиргача Кобул шаҳрининг 15-мавзесига икки мингта камера ўрнатилганини таъкидлади.
Задранга кўра, аҳолининг хавфсизликни таъминлашдаги ҳамкорлигини реал тарзда исботлаш учун уйлар, бинолар ва боғларда видеокузатув камералари ўрнатилиши керак. Айни пайтда «Толибон» бу кампания ҳамма учун мажбурий эмаслиги ва молиявий имконияти бўлганлар буни қилиши мажбурийлигини айтди.
Аввалроқ Афғонистонда «Толибон» ҳукумати аёлларни Ички ишлар вазирлигининг жамоат хавфсизлиги бўлинмаларидан бирига хизматга қабул қилишни бошлаганди. Катта эҳтимол билан улардан аёллар иштирокидаги намойишларга қарши курашишда фойдаланилади.
Изоҳ (0)