Илк бор Ўзбекистоннинг 8 та олий таълим муассасаси топ-1000 таликдаги Осиёнинг энг кучли университетлари рўйхатига киритилди, деб хабар бермоқда Олий ва ўрта махсус таълим вазирлиги матбуот хизмати.
Маълум қилинишича, Quacquarelli Symonds халқаро рейтинг ташкилоти Осиё Университетларининг 2023 йил учун рейтинг (QS Asia University Rankings 2023) натижаларини эълон қилди. Унга кўра, илк бор Ўзбекистоннинг 8 та олий таълим муассасаси топ-1000 таликдаги Осиёнинг энг кучли университетлари рўйхатига киритилди.
Халқаро рейтинг тузувчи ташкилот Quacquarelli Symonds’нинг бу йилги рейтинги бугунги кунга қадар энг каттаси ҳисобланиб, ўз ичига 760 та энг кучли Осиё университетларини қамраб олган. Шунингдек, рейтингни шакллантиришдаги асосий кўрсаткичлар сифатида академик ва иш берувчининг обрўси, PhD даражасига эга бўлган ходимлар сони ҳамда халқаро талабалар улуши каби меъзонлар биринчи маротаба киритилди.
QS Asia University 2023 рейтингида Осиё қитъасидаги университетлар жойлашувига қараб минтақавий ўринлари ҳам белгиланган бўлиб, мамлакатимизнинг юқоридаги 8 та олий таълим муассасаси QS Марказий Осиё Университетлар Рейтингида ҳам муносиб ўринларни эгаллади.
QS Asia University Rankings рейтингини тузишда ОТМнинг қуйидаги 11 та кўрсаткичи баҳоланади:
- илмий (академик) обрў (профессор-ўқитувчиларнинг овози) — 30 фоиз;
- иш берувчининг баҳоси — 20 фоиз;
- профессор-ўқитувчилар/талабалар нисбати — 10 фоиз;
- халқаро тадқиқот тармоғи (Scopus’даги мақолалар сони) — 10 фоиз;
- битта мақолага берилган иқтибослар — 10 фоиз;
- ҳар бир профессор-ўқитувчи ҳиссасига тўғри келадиган мақолалар сони — 5 фоиз;
- PhD даражасига эга ходимлар сони — 5 фоиз;
- халқаро профессор-ўқитувчиларнинг улуши - 2,5 фоиз;
- чет эллик талабаларнинг улуши — 2,5 фоиз;
- алмашинув дастурлари доирасида хориждан келган талабаларнинг улуши — 2,5 фоиз;
- хорижга борган талабаларининг улуши — 2,5 фоиз.
Изоҳ (0)