Вашингтонда Ўзбекистон адлия вазири Русланбек Давлетов ва ташқи ишлар вазири ўринбосари Фурқат Сиддиқов бошчилигидаги делегация ташрифи доирасида Оқ уй ва АҚШ Давлат департаментининг юқори мартабали вакиллари билан музокаралар ўтказилди, деб хабар бермоқда «Дунё» АА.
АҚШ президентининг махсус ёрдамчиси Эрик Грин билан учрашувда Ўзбекистонда давлат бошқаруви тизими самарадорлигини ошириш соҳасида амалга оширилаётган ислоҳотлар, қонунчиликни либераллаштириш жараёни, шунингдек, суд-ҳуқуқ ислоҳотларини илгари суриш чора-тадбирлари хусусида сўз юритилган.
Эрик Грин Ўзбекистон—АҚШ муносабатларининг бугунги даражасини юқори баҳолади. У ўзаро ҳамкорлик кўплаб устувор йўналишларда очиқ ва конструктив мулоқотнинг ўзига хос динамикаси билан ажралиб турганини таъкидлади. АҚШ Марказий Осиёдаги интеграция жараёнларини, шунингдек, савдо-иқтисодий ривожланишни кенгайтириш, минтақанинг энергия хавфсизлигини мустаҳкамлашни қўллаб-қувватлаши қайд этилган.
Давлат котибининг Жанубий ва Марказий Осиё бўйича ёрдамчиси Дональд Лу билан учрашувда қонун устуворлигини таъминлаш соҳасидаги ҳамкорликнинг бугунги ҳолати, инсон ҳуқуқлари ҳимоясини таъминлаш билан боғлиқ масалалар кўриб чиқилган. Дональд Лу Америка томонининг ушбу соҳаларда амалга оширилаётган ислоҳотларни қўллаб-қувватлаш, жумладан, маслаҳат ва техник ёрдам кўрсатишга содиқлигини таъкидлаган.
Ўзбекистон делегациясининг АҚШ Давлат департаментининг Афғонистон бўйича махсус вакили Томас Вест билан учрашувида Афғонистондаги вазиятни барқарорлаштириш доирасидаги ҳамкорликни янада чуқурлаштириш истиқболлари муҳокама қилинган.
Махсус вакил Ўзбекистон Афғонистондаги вазиятни ҳал қилишда муҳим рол ўйнаётганини таъкидлаган. Дипломат жорий йил июль ойида Тошкентда бўлиб ўтган Афғонистон бўйича халқаро конференция натижаларини юқори баҳолаб, Ўзбекистон АҚШ қўшинлари Афғонистондан олиб чиқиб кетилганидан кейин биринчи марта барча манфаатдор давлатлар ва томонлар вакилларини бир даврада тўплашга муваффақ бўлганини урғулаган.
Оқ уй ва Давлат департаменти вакиллари билан бўлиб ўтган учрашув ва музокараларда икки томонлама ва минтақавий шериклик соҳасидаги ҳамкорликда эришилган ютуқлар мамнуният билан қайд этилган, шунингдек, томонлар икки давлат ўртасидаги стратегик шерикликни фаол ривожлантиришга ўзаро тайёр эканлигини билдирган.
Изоҳ (0)