Журналист Ксения Собчак Россияга қайтиб келди, деб ёзади «РИА Новости» гувоҳларга таяниб, улар Собчак Псков вилоятида чегарани кесиб ўтганини кўрган.
Гувоҳлар агентликка маълум қилишича, Собчак турмуш ўртоғи Константин Богомолов билан бирга Латвия билан чегарада жойлашган «Бурачки» ўтказиш пункти орқали Россияга кирган. Бу ҳақда Маш Telegram-канали ҳам ёзмоқда.
Шунингдек, Ксения Собчакнинг Россияга қайтгани ҳақида унинг танишларидан бири «РБК»га маълум қилган, журналистнинг оиласига яқин манбалар эса «ТАСС»га хабар берган.
Собчакнинг ўзи буни изоҳлаганича йўқ. Ўтган ҳафта унинг онаси, Федерация кенгаши аъзоси Людмила Нарусова қизи «жуда яқин вақтда» Россияга қайтиб келишини айтганди. Ҳозир у изоҳ беришдан бош тортган.
Собчак Россиядан 26 октябрь куни кетганди. Ўша куни унинг Москва вилоятидаги уйи унинг тижорат директори Кирилл Сухановга нисбатан очилган таъмагирлик ҳақидаги иш бўйича тинтув қилинганди. Собчак Исроил фуқароси сифатида Беларусь орқали Литва ҳудудига ўтган.
«ТАСС» давлат агентлиги ўз манбаларига таяниб, полицияга терговчининг Собчакни қўлга олиш тўғрисидаги қарори келиб тушгани, бироқ у «яширинишга муваффақ бўлгани» ҳақида маълум қилганди. Кейинроқ, агентлик ёзишича, ИИВ терговчиси Собчакни гумонланувчи сифатида жалб қилиш ҳақидаги қарорни бекор қилган. Собчакнинг адвокати Сергей Бадамшин эса унда «иш бўйича гумонланувчи ёки айбланувчи мақоми йўқ ва бўлмагани»ни айтганди.
Собчак «Осторожно, Медиа» («Эҳтиёт бўлинг, матбуот») лойиҳасини бошқаради, у янгиликлар Telegram-каналлари ва пабликларини, подкастлар студиясини, шунингдек, Собчакнинг ижтимоий тармоқларини ўз ичига олади.
Собчак — телебошловчи ва сиёсатчи, 2018 йилда у Россия президенти сайловида қатнашиб, 1,68 фоиз овоз билан тўртинчи ўринни эгаллаган. 2019 йилдан буён «Эҳтиёт бўлинг, Собчак!» YouTube каналини юритиб, янгиликлар шарҳлари ва таниқли шахслар билан интервьюларни жойлаб боради.
Изоҳ (0)