Охирги саккиз йил метеорологик кузатувлар тарихидаги энг иссиқ йил бўлди. Бу ҳақда Бирлашган Миллатлар Ташкилоти бош котиби Антониу Гутерриш COP-27 иқлим ўзгариши бўйича конференция иштирокчиларига мурожаатида айтди.
Бош котибнинг сўзларига кўра, иқлим ўзгариши «ҳалокатли тезликда» бормоқда ва сайёра «қайғули сигнал юбормоқда».
«Ҳозирга қадар ўтган ҳар бир иссиқлик тўлқини, айниқса, заиф аҳоли орасида янада кучлироқ ва ҳаёт учун хавфли бўлди», — деди у.
Гутерриш Жаҳон метеорология ташкилоти ҳисоботига шу тариқа фикр билдирди ва уни «иқлим хаосининг хроникаси» деб атади. ЖМТ 6 ноябрь куни тақдим этган ҳужжатда айтилишича, бу йил глобал ўртача ҳарорат саноатдан олдинги даврга (1850—1900 йиллар) нисбатан 1,15 даражага юқори бўлади.
The Guardian ушбу ҳисоботдан асосий парчаларни келтирган:
- атмосферада иссиқликни ушлаб турувчи иссиқхона газларининг концентрацияси 2021 йилда янги рекорд даражага етди;
- денгиз сатҳи 30 йил олдингига қараганда икки баравар тез кўтарилмоқда, глобал океан ҳарорати эса рекорд даражага етди;
- Алп тоғларидаги музликлар бу йил ҳар қачонгидан ҳам тезроқ эримоқда (Швейцария музликларини мониторинг қилиш хизмати маълумотларига кўра, музликлар бу йил умумий ҳажмининг 6 фоизини йўқотган).
Изоҳ (0)