Россия Украина билан музокаралар учун очиқ, бироқ Киевнинг Россия томони билан мулоқотдан воз кечиш бўйича позицияси туфайли, бунга имконият борлигини кўрмаяпти, деди мамлакат президенти матбуот котиби Дмитрий Песков.
«Россия томони очиқ бўлиб қолиши ва музокаралар йўли билан ўз мақсадларига эришишга тайёрлиги ҳақида биз кўп марта айтганмиз. Аммо ҳозирги пайтда бундай имкониятни кўрмаётганимиз ҳақида ҳам ўзимиз таъкидлаганмиз, чунки Киевда Россия томони билан ҳеч қандай музокаралар олиб бормаслик ҳақидаги қонун кучга киритилган», — деди Песков.
Владимир Путиннинг матбуот котибидан АҚШ президенти Жо Байден маъмурияти шахсий суҳбатлари чоғида Украина раҳбариятини Россия билан музокараларга очиқликни намойиш этишга чақираётгани ҳақида Washington Post эълон қилган хабар ҳақида ҳам сўрашган.
«Биз бу рост ёки ёлғонлигини билмаймиз. Рост бўлган хабарлар ҳам бор, лекин мутлақо тахминлардан иборат бўлган хабарлар кўпроқ… Шунинг учун бу ҳақиқатга тўғри келишига ишончимиз комил бўлмасдан туриб, изоҳ бера олмаймиз», — деб жавоб берди у.
30 сентябрь куни Кремлда Донецк ва Луганск халқ республикалари ҳамда Украинанинг Херсон ва Запорожье вилоятлари босиб олинган қисмларининг «Россия таркибига кириши» ҳақида шартномалар имзоланди. Ўша куниёқ Украина ҳукумати НАТОга қўшилиш учун ариза берди. Зеленский ўшанда Россия билан мулоқотга тайёрлигини айтган, лекин «бошқа президент билан» деган эди.
4 октябрь куни эса Украина расман Путин билан ҳар қандай музокаралардан бош тортди.
30 октябрь куни ташқи ишлар вазири Сергей Лавров Россия ва президент Владимир Путин Украинадаги вазият бўйича музокараларга тайёрлигини яна бир марта тасдиқлади. Ўша куниёқ президент матбуот котиби Дмитрий Песков Киев билан музокаралар ва Зеленский билан келишувлар «ҳеч нарсага арзимаслигини», чунки «ташқаридан берилган буйруқ орқали» бир лаҳзада бекор қилиниши мумкинлигини айтди. «Шуни аниқ-равшанки, ҳал қилувчи овоз — Вашингтонники», — деди у.
Изоҳ (0)