Илон Маск Twitter’ни 44 миллиард долларга сотиб олганидан сўнг компания ўз ходимларининг қарийб ярмини ишдан бўшатган эди. Энди эса Twitter ишини йўқотган ўнлаб ходимлари билан боғланиб, улардан қайтишни сўрамоқда. Бу ҳақда вазиятдан хабардор манбаларга таяниб, Bloomberg ёзмоқда.
Икки манбанинг айтишича, қайтиши сўралган ходимларнинг баъзилари хатолик туфайли ишдан бўшатилган. Бошқалари эса Илон Маск истаётган янги функцияларни яратиш учун уларнинг тажрибаси керак бўлиши англаб етилмасдан бўшатиб юборилган.
Маскнинг қўлига ўтганидан сўнг Twitter харажатларни камайтириш учун 3700 га яқин ходимини ишдан бўшатганди. Аксарият ходимлар электрон почта ва Slack каби корпоратив тизимларга кира олмай қолганидан кейин ишдан бўшатилганини тушунган. Ходимларга юборилган қайтиш ҳақидаги сўровлар жараён қанчалик шошилинч ва тартибсиз бўлганидан далолат беради.
Twitter матбуот котиби изоҳ ҳақидаги сўровга жавоб бермади.
«Twitter ходимларини қисқартиришга келсак, афсуски, компания кунига 4 миллион доллардан кўпроқ йўқотаётган пайтда бундан бошқа танлов йўқ», — деб ёзган Маск аввалроқ Twitter’да.
Вазиятдан хабардор одамларнинг сўзларига кўра, Twitter’да 3700 га яқин ходим қолмоқда. Маск компанияда қолганларни янги функцияларни яратиш учун тезроқ ҳаракат қилишга ундамоқда, айрим ҳолларда ходимлар янги топшириқни якунлаш учун 24/7 режимида ишлашга мажбур бўлмоқда.
Изоҳ (0)