Қирғизистон «Капитал-банк»и Россиянинг МИР тўлов тизими карталарига хизмат кўрсатишни тўхтатди, дея хабар бермоқда «Коммерсантъ». Бу Қирғизистонда МИР карталарини қабул қилишдан бош тортган 13-банкдир.
Эндиликда «Капитал-банк» банкомат ва POS терминалларда МИР карталарини қабул қилмайди. Шунингдек, Миллий тўлов карталари тизими доирасида ушбу карталар ёрдамида мижозларга ўтказмаларга хизмат кўрсатмайди.
Сўнгги икки ой ичида Қирғизистоннинг бир нечта банклари МИР карталарини қабул қилишдан бош тортди.
15 сентябрь куни АҚШ Молия вазирлиги Россиянинг МИР тўлов тизимини хорижда қўллаб-қувватлагани учун санкциялар қўллаш билан таҳдид қилди.
Шундан сўнг МИР карталарига Туркия ва Ўзбекистон банклари хизмат кўрсатишни тўхтатди. МИР тизимини жорий этишга ваъда берган Шри-Ланка ҳукумати октябр ойи ўрталарида бу ғоядан воз кечди.
Аввалроқ Ўзбекистонда МИР карталарига хизмат кўрсатишни қайта тиклаш режалаштирилмаётгани ҳақида хабар берилган эди.
Изоҳ (0)