Ўзбекистонда тиббиёт ходимларини ҳам боди-камера билан таъминлаш таклиф этилди

Олий Мажлис Қонунчилик палатаси депутати Қизилгул Қосимова тиббиёт ходимларини боди-камера билан таъминлашни таклиф қилди.

«Назаримда, тиббиёт ходимлари ҳам боди-камера билан таъминланиши лозим. Масалан, ички ишлар органлари ходимларида ана шундай мосламалар мавжуд. Айни пайтда 3 минг нафарга яқин тиббиёт ходими мавжуд деб ҳисобласак, ушбу масалани ҳал қилиш катта маблағ талаб қилмаса керак. Аксинча, бу орқали фуқароларнинг ҳам, тиббиёт ходимининг ҳам масъулияти ошади, зўравонликларга барҳам берилади, деб ўйлайман», — деган у.

Депутат тиббиёт ходимларига тажовуз қилиш ҳолатлар кўпайиб бораётганини қайд этиб, бундай ҳолатнинг олдини олишдаги энг асосий ва самарали йўллардан бири ноқонуний хатти-ҳаракатлар учун жавобгарликни кучайтириш, уларни безорилик сифатида квалификация қилиш зарурлигини билдирган.

Шунингдек, йўлларда тез ёрдам машинасига йўл бермаслик ҳолатларига нисбатан жарималар ҳажмини кўпайтириш кераклигини айтган.

Мавзуга доир: Ўзбекистонда тиббиёт ходими фаолиятига аралашганлик учун жавобгарлик белгиланмоқда