Жанубий Корея ва АҚШнинг мунтазам ҳарбий машғулотлари фонида Шимолий Корея Ташқи ишлар вазирлиги Вашингтонни КХДРга қарши ядро урушига тайёргарлик кўраётганликда ва Корея яриморолидаги вазиятни атай кескинлаштиришда айблади. Бу ҳақда Шимолий Корея марказий телеграф агентлигига таяниб, «РИА Новости» хабар берди.
«АҚШ ва Жанубий Кореянинг бемулоҳаза ҳарбий ҳаракатлари туфайли Корея ярим ороли ва унинг атрофидаги вазият яна қарама-қаршиликнинг жиддий босқичига кирди», — дея таъкидлади КХДР Ташқи ишлар вазирлиги вакили.
Шимолий Корея ТИВнинг исми ошкор этилмаган вакилига кўра, дунёнинг ҳеч қайси жойида вақти, кўлами, мазмуни ва интенсивлиги жиҳатидан АҚШ ва иттифоқчиларининг қўшма ҳарбий машқлар каби «очиқдан очиқ агрессив» бўлган ҳарбий машғулотлар ўтказилмайди.
Пхеньян АҚШнинг КХДРга нисбатан Корея ярим оролидаги вазиятни кескинлаштириш бўйича айбловларини «беъмани» деб ҳисобламоқда. «Агар АҚШ барибир жиддий ҳарбий провокацияга қўл урса, биз янада жиддийроқ жавоб чораларини кўриб чиқамиз», — дея сўзини якунлади Шимолий Корея ТИВ вакили.
Аввалроқ АҚШ ва Жанубий Корея қарийб беш йил ичида биринчи кенг кўламли қўшма Вигилант Сторм ҳаво машғулотларини бошлаган эди. Унда 240 дан ортиқ самолёт, шу жумладан, илғор «кўринмас самолётлар», хусусан, F-35А «кўринмас қирувчилар» иштирок этмоқда.
Ушбу машғулотлар Шимолий Корея томонидан бир қатор ракеталар учирилганидан сўнг, қолаверса, Пхеньян яқин орада ядровий синов ўтказиши мумкинлиги ҳақидаги хавотирлар фонида амалга оширилмоқда.
25 октябрь куни Жанубий Корея президенти Юн Сок Ёл Шимолий Корея ядровий синовларга тайёргарликни якунлаганини маълум қилди. Унинг фикрича, Пхеньянда сўнгги беш йил ичида биринчи марта ядровий қурилма портлаши муқаррар. АҚШ, Жанубий Корея ва Япония Шимолий Кореяга ядро синови учун жазо ваъда қилди ва бу БМТ Хавфсизлик Кенгаши резолюцияларини бузишини таъкидлади.
Изоҳ (0)