Байден телефон суҳбати чоғида Зеленский кўпроқ ёрдам сўраганидан кейин жаҳли чиқиб, унга ўшқириб берган — ОАВ

Июнь ойидаги телефон суҳбатларидан бирида Украина президенти Владимир Зеленский АҚШдан Киевга кўпроқ қурол етказиб беришни сўраганида президент Жо Байден ўзини тута олмай, унга ўшқириб берган. Бу ҳақда NBC News ўз манбаларига таяниб ёзмоқда.

Нашр маълумотларига кўра, ыуҳбат бошида Байден Зеленскийга Украинага бир миллиард доллар миқдорида навбатдаги ёрдам траншини ҳозиргина маъқуллаганини айтган, шундан кейин Зеленский Киев сўраган, аммо ҳали қабул қилиб олмаган зарур қурол-яроғларни санаб ўта бошлаган.

Бундай гаплар, NBC News ёзишича, Америка президентининг «жаҳлини чиқарган». Байден, «овозини баландлатиб», ўз суҳбатдошига берилаётган кўмак учун кўпроқ миннатдорлик билдириши мумкинлигини, чунки Америка халқи «шундоқ ҳам ғоятда сахий бўлгани»ни, Оқ уй ва Пентагон эса Украинага «ёрдам бериш учун кўп ишлагани»ни айтган.

Ўша суҳбатдан аввал, деб ёзади NBC News, Оқ уйда бир неча ҳафталар мобайнида Зеленский омма олдидаги нутқларида фақат Украинага нималар бўйича ёрдам берилмаганига эътиборни қаратиши юзасидан норозилик кучайиб борган — айни вақтда Вашингтондаги мансабдорларнинг ўзлари қўлларидан келганича ҳаракат қилаётганига амин бўлган.

Ўша суҳбатдан кейин Зеленский жамоатчилик олдида чиқиш қилиб, АҚШга «аямасдан ёрдам бераётгани» учун миннатдорлик билдирган. Шундан буён президентлар ўртасидаги муносабатлар фақат яхшиланиб борган, деб ёзади NBC News.

АҚШда 8 ноябрь куни Конгрессга оралиқ сайловлар бўлиб ўтади. Республикачилар озчилиги етакчиси Кевин Маккарти октябрь ўрталарида агар унинг партияси Конгресс устидан назоратни қўлга киритса, Украинага ёрдам камайтирилиши мумкинлигини маълум қилганди. Айни вақтда АҚШ фуқароларининг тобора камроқ қисми Россия урушда ғалаба қозониши борасида хавотирланмоқда — май ойидан буён бу кўрсаткич 55 дан 38 фоизгача тушган.

АҚШ Украинага ҳарбий ёрдам ҳажми бўйича сўзсиз етакчидир. Октябрь охири ҳолатига, унинг ёрдами 27,2 миллиард долларга баҳоланмоқда. Бу Британия (3,7 миллиард доллар) ва Евроиттифоқнинг (2,5 миллиард доллар) умумий кўмаги ҳажмидан тўрт ярим марта кўпроқ демакдир.