Тошкент вилоятининг Янгийўл шаҳрида 26 миллион сўмга тенг бўлган қалбаки купюрани муомалага киритмоқчи бўлган гуруҳ ушланди.
Вилоят ИИББ матбуот хизмати хабарига кўра, улар 21 октябрь куни Янгийўл шаҳар ички ишлар бўлими ходимлари томонидан ўтказилган тезкор тадбир давомида далилий ашёлар билан ушланди.
Аниқланишича, бундан бир неча кун олдин Чирчиқ шаҳрида яшовчи 31 ёшли фуқаро (А.У) 37 ёшли аёли (К.К) билан бирга уч нафар таниши (бир нафар аёл ва икки эркак)ни жалб қилган ҳолда бир гуруҳ бўлиб, Бўстонлиқ туманида жойлашган дала ҳовлиларнинг бирини ижарага олган ва у ерда 100 ва 200 минг сўмлик валютани қалбаки усулда тайёрлаган.
Орадан бироз вақт ўтиб, ушбу купюраларни муомалага киритиш мақсадида Янгийўл шаҳар марказий бозорига келган ушбу шахслар (тадбиркорлар хабари асосида) ички ишлар бўлими ходимлари томонидан гумонланувчи тариқасида қўлга олинган.
Ҳолат юзасидан холислар иштирокида ўтказилган тинтув жараёнида улардан жами қиймати 26 миллион 200 минг сўмга тенг бўлган 100 ва 200 минг сўмлик қалбаки купюралар ва рангли принтер далилий ашё сифатида олинган (қалбаки пулларга нисбатан экспертиза тайинланган).
Ҳозирда мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) 2-қисми «в» банди билан жиноят иши қўзғатилиб, тергов ҳаракатлари олиб борилмоқда.
Изоҳ (0)