Европа кенгаши раҳбари Ўзбекистонга келди

Европа кенгаши раҳбари Шарл Мишел 27 октябрь куни Ўзбекистонга келди.

У Қозоғистон президенти таклифига биноан Остонада 26—27 октябрь кунлари Марказий Осиё давлатлари раҳбарлари учрашувида иштирок этганди. Учрашув тугагач Ўзбекистонга йўл олди.

28 октябрда у Шавкат Мирзиёев билан музокаралар ўтказади. Мамлакатнинг Европа Иттифоқи билан икки ва кўп томонлама ҳамкорлигига оид масалаларнинг кенг доираси кўриб чиқилади.

Олий мартабали меҳмон Самарқанд шаҳрига ҳам ташриф буюради.

Маълумот учун, Шарл Мишел Бельгия ва Европа давлат ва сиёсат арбоби. 2019 йил 1 декабрдан Европа кенгаши раиси. У 2014—2019 йилларда Бельгия бош вазири бўлган.

Ўзбекистоннинг Европа Иттифоқи билан муносабатлари 1992 йил 15 апрелда Ўзбекистон ҳукумати ва Европа ҳамжамиятлари комиссияси ўртасида ўзаро англашув меморандумининг имзоланиши билан бошланган. 1996 йил июнида Флоренцияда Европа Иттифоқи ва Ўзбекистон ўртасида Шериклик ва ҳамкорлик тўғрисидаги битим давлат раҳбарлари даражасида имзоланган.

Ўзбекистон ва Европа Иттифоқи ўртасида Кенгайтирилган шериклик ва ҳамкорлик тўғрисидаги амалдаги битим 2022 йилнинг 6 июлида имзоланган.