Сурхондарёда собиқ раҳбар Lacetti-2 хизмат машинасини 15,5 млн сўмга сотиб юборгани аниқланди

Сурхондарё вилояти Ангор туманида хизмат автотранспорт воситасини 15,5 миллион сўмга сотиб юборган собиқ раҳбар аниқланди. Бу ҳақда Иқтисодий жиноятларга қарши курашиш департаменти хабар берди.

Таъкидланишича, Бош прокуратура ҳузуридаги департаментнинг Ангор тумани бўлими томонидан туман Аҳоли бандлигига кўмаклашиш марказининг мурожаатига асосан терговга қадар текширув ўтказилган. Унда марказнинг собиқ директори А.Ю. ушбу марказнинг Lacetti-2 русумли автотранспорт воситасини 2021 йил 13 декабрда аукцион савдоси орқали сотиш мазмунидаги йиғилиш баённомасини тайёрлаб, аслида 98,2 миллион сўмлик автомобилни «С.С.» МЧЖ томонидан ўтказилган аукцион савдоси орқали фуқаро Ж.Й.га 15,5 миллион сўмга сотилгани тўғрисида ҳужжатларни расмийлаштириб, ўзганинг мулкини ўзлаштириш йўли билан талон-торож қилгани аниқланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.